Aizawl August 22, 2023 : Chemte nen dawr nghakte vaua pawisa laksaktu Lalnunthara (24) s/o Lalneihsanga (L) Kolasib Vengthar chu police ten manin thubuai an siamsak a, nimin khan district court-a hruai a nih hnuah jail lamah thawn a ni. Hetih lai hian dawr a rawkna veng pakhat Khuangpuilam branch YMA chuan dawr neitu in huaisen taka hriamhrei nen an dawr luhchilhtu a beilet ngam chu an chhuang tih an sawi.

Thudawn danin Lalnunthara hi Khuangpuilam Coffee Dawr-ah Thawhlehni August 20 tlai dar 5:30 vel khan lutin dawr neitu, amah chauha lo awm Lalkiamlovi w/o Lalzamliana (L) chu pawisa a dil a, chemte phawrhin a vau zui bawk. Dawr neitu hian a pek mai loh avangin amah hian pawisa bawm a mi pawisa chu thamin a kalchhuak tur hi dawr neitu chuan a hnung lam atangin a pawm bet a, a fanu lo awm ve chuan a pui nghal bawk.

An in chai buaina ah hian Lalnunthara chemte hian dawr neitunu hi a kut dinglamah a zai a, hliam na erawh a ni lo. Hemi lai hian an thenawm nu pakhat kal chuan hmu in dawr bul vela awm mipa dangte a pun a, hemi lai hian dawr rawktu hi a tlanchhuak a, pawna a scooty dah hmanga tlanchhiat a tum laiin an man zui a ni.

Hemi hma kar liamta Inrinni zan tlai pawh khan Venglai Parkkawn-a dawr pakhatah lutin a chemte pai a phawrh a, dawr nghaktu hmeichhia chu vau betin pawisa fai cheng 6,000 dawn a lachhuak tawh bawk. Hemi tum hian man a ni lova, hei vang hian Kolasib Venglai YMA te chuan an zawng a, CCTV in amah a lo lak fuhna thlalak te pawh amah zawnna lamah an thehdarh bawk a ni.

Nimin khan Khuangpuilam branch YMA chuan thuchhuah siamin hriamhrei nena dawr rawktu, huaisen taka a lo beihlet vanga man a ni thei chu an chhuang tih an tarlang. Thuchhuah chuan, "August 20, 2024 (Thawhlehni) tlai dar 5:30pm vel khan kan veng mi leh sa Pi Kiamlovi w/o Pu Lalzamliana (L) Vanapa Section chu Lalnunthara s/o Lalhmunmawii, Soil Mual, Vengthar, Kolasib chuan a dawrah luhchilhin hriamhrei (chemte) hmanga vauin pawisa engemaw zat a chhuhsak a. Amaherawhchu, Pi Kiamlovi leh a fanu ten huaisen taka an beih letna avang leh thenawm khawveng leh kawng a lo awm remchang mi tlawmngaite zarah thil sual titu hi man a ni," tiin Kiamlovin a lo beihletna lamah a kutah hliam tenau a tuar tih an sawi a, huaisen taka a lo bei let ngam chu an chhuang tak zet tih an sawi.