Aizawl : Chief Minister Zoramthanga chuan nimin zing khan Zuangtui-ah Aizawl Smart City Limited hmalakna hnuaia cheng vaibelchhe 15.05 senga sak Indoor Stadium atan lungphum a phum a. Urban Development & Poverty Alleviation Department chuan Zuangtui SR Hall ah hemi pual hian inkhawm a buatsaih. Tourism Minister Robert Romawia Royte chu khualzahawm a ni.

Khuallian Chief Minister Zoramthanga chuan vawiinah badminton khelmi te tana tangkai tak tur, court 6 awmna indoor stadium atan lungphum phum a ni chu lawmawm a tih thu a sawi a. Khawtlang leh state angin badminton a hma sawn phah ngei beiseiawm a tih thu a sawi. Chief Minister chuan hmasawnna ruhrel tha din hian a pawimawhna zar zova hmasawnna dang a thlen belh thin dan sawiin, he indoor stadium pawh hi Zuangtui leh a chhehvel veng tan sports lamah mai bakah sumdawnna leh thildangah hmasawnna engemaw tala a thlen phah a beisei thu a sawi. 

Indoor Stadium, Zuangtui sak han thawktu stan hian F. Lalliansanga, Aizawl Venglai chu thlan (open tender dt 17.12.2021 kaltlangin) a ni a. NTP issue ni hi June ni 10, 2022 niin contract agreement date chu June ni 3, 2022 a ni a. June ni 17, 2022 khan hna thawh tan nghal niin ruahmanna ang chuan thla 18 chhung (10.12.2023) a zawh hman tur a ni. Tunah hian a sak nan cheng vc 2.06 hman tawh niin physical progress chu 29.09% a ni.

Stadium ah hian Badminton court paruk (court area 6.10 x 13.50 m theuh) leh gallery mi 345 thut lenna tur a awm dawn a. Ground floor ah hian lirthei ke pali nei 33 leh ke pahnih nei 39 lenna tur parking area ruahman a nih bakah ticket counter, admin room, cafeteria, pantry, toilet block, pump room, chowkidar room, store room leh adangte dah tum a ni a. First floor chu gymnasium, dormitory, changing & locker room, first aid room, coach room, yoga room leh dangte atan ruahman a ni.