April 21, 2022; Mizoram sawrkar a Transport department chuan chhiah pek ngaihsak tawh lo (registration nung tawh lo) 48,599 chu 'blacklist' ah a dah tawh a, heng bakah hian blacklist a dah hmabak, chhiah pe tha lo 8,709 chhinchhiah (Demand Notice pek mek) an nei leh tawh.

Transport department chuan tun hma lam atangin lirthei neitu ten lirthei chhiah an pek that loh avangin AG office atangin audit chungchangah harsatna a tawk thin tih an tarlang a, chumi vang chuan VAHAN DATABASE a lirthei awm si, registration nung tawh lo leh chhiah pek ngaihsak tawh lote thenfai hna a thawk mek tih an tarlang.

Motor registration chu kum 15 chhung a dam a, December 31, 2019 a registration nung tawh lo 48,599 zet chu a neitute hnenah 'Demand Notice' Transport deaprtment in a pek hnuah, an chhiah bate an pek loh avangin dan angin chungte chu blacklist a dah an ni.

Hemi hnu December 31, 2021 ah mimal lirthei registration thi tawh 8,709 zet a awm leh tih Transport department chuan tarlang bawkin, heng lirthei neitute hnenah 'Demand Notice' pek chhuah leh mek a ni a, hun tiam chhunga an lirthei registration an tih nun loh a, an chhiah bate an pek loh chuan dan angin blacklist leh tur a ni.