ZALEN October 28, 2024 : Vawiin khan Sinlung Hills Council inthlan lo awm tura campaign mek MNF Senior Vice President, Dr. R. Lalthangliana chuan Sinlung Hills Council-ah MNF official candidate-te thlan tlin an nih chuan, state-ah MNF sawrkar lo mah se, an beisei leh rin aia an tihfuh tur thu a sawi a, MNF official candidate-te chu vote vek turin mipui a ngen.

Dr. R. Lalthangliana chuan ZPM sawrkar tharin oil man tihsan chu MNF-in a do hrim hrim vang ni lovin; a man tih sanna a tam tham em avang leh inthlan campaign laia chhiah tihpun loh sawi fo thinte khan mipui an bum nasatzia a tarlang a ti. Chhiah tihpunte chu mirethei zawkte rawkna anih thu leh anmahni party mi leh sate inhaivurna anih thu a sawi.

MNF sr. Vice President chuan thil man a to tawh chuan a tlakhniam tawh ngai loh thu sawiin, covid lai khan Kuva pack khat 50 a ni a, tun thlengin a tlahniam leh tawh lo, chuvangin tuna thil man to chi hrang hrangte hian khawsak harsa zawkte a a la nghawng dawn chauh a. Lirthei chuan man leh sa man thlengin a la rawn to chhunzawm zel dawn a, a ti.

Dr. R. Lalthangliana chuan kalphung thar sawrkarah ruat chawpte inenkawlna senso a tam thu sawiin, "MNF sawrkar-ah khan CM Adviser 2 leh SEDP Board 14 Vice Chairman leh a staff hlawh kum 5 chhung atan cheng nuai 1248.00/- a ni a. ZPM sawrkar-ah hian CM Adviser 5, cheng khat hlawh te, OSD-te, Revenue Consultant -1, Joint Secretary rank-1, Corporation Chairman - 5, MYC Chairman leh AMC/LMC hlawh tihpunna nen kum 5 chhunga sum senso chu cheng nuai 13,416 /-a ni daih a, kum 5 chhunga MNF sawkar aia ZPM sawrkar senso tamna chu cheng nuai 12,168 /- a ni," a ti bawk.

Dr. Thangtea chuan, "ZPM-ten inthlan campaign laia an sawi vul chuk, thlai thar leh hmunphiah kan lei ang an tih kha, heng lai hmuna chengte hian hmunphiah in ching nasa a, kum khat dawn tep an sawrkarah pawh hmunphiah an la leisak theilo," tiin pawi a tih thu leh vanduaithlak a tih thu a sawi a, hengte hi ruahmanna fel tawk loh rah chhuah a niin a sawi.