Aizawl August 29, 2023: Chief Election Commissioner Rajiv Kumar leh Election Commissioner pahnih - Anup Chandra Panday leh Arun Goel ; Sr. Dy. Election Commissioner Nitesh Vyas, Dy. Election Commissioner Hirdesh Kumar, Dy. Election Commissioner R.K. Gupta bakah ECI officials 12 te'n vawiin khan ni thum cham turin Mizoram inthlan inbuatsaihna kalpui mek thlithlai turin an rawn thleng.

India danpui constitution article 324 -in a tarlan angin state general election a thuneihna pumhlum neitu chu Election Commission of India (ECI) a ni a, Kum tawp December ni 17 khian tuna 8th Mizoram Legislative Assembly term hi a tawp dawn avangin inthlan hmachhawn dan tur inbuatsaihna kalpui mekte an rawn endik dawn a ni.

Ruahman lawk angin vawiin hian ECI full commission hian Mizoram Governor Hari Babu Kambhampati chu a chenna in Raj Bhavan-ah an hmuh bakah Aijal Club-ah National & State recognised political party aiawh, dan leh thupek kengkawhtu (enforcement agencies), Mizoram Chief Electoral Officer (CEO), State Police Nodal Officer (SPNO) leh Central Armed Police Force (CAPF) te hmalakna leh ruahmanna an siam te, boruak muanawm tak hnuaia inthlanna felfai leh thianghlim a awm theih nan an endik a ni.

Naktuk-ah ruahman ang chuan Aijal Club-ah vek Mizoram Chief Secretary (CS) leh Director General of Police (DGP) te meeting an neihpui dawn bakah District 11-a District Election Officers (DEO) leh Superintendent of Police (SP) te inbuatsaihna an thlirho dawn a, media mite nen inkawm hona press conference nei tum a ni bawk.

A nithumni-ah Systematic Voters Education and Electoral Participation (SVEEP) hnuaia hmalakna te a hmunah an endik dawn bakah State Icon te leh PwD (Vohbik) Voters leh Young Voters te nen inkawmhona neih tura ruahman a ni bawk.