Aizawl August 30, 2023 : Chief Election Commissioner (CEC) Pu Rajiv Kumar kaihhruai Election Commission Team chuan ni thum cham turin Thawhlehni khan Aizawl an rawn theng a, State General Election lo awm tur atana inpuahchahnate endik turin an rawn kal an ni.

Naktukah Election Commission Team-te hian Assembly House Annex Building-a SVEEP Exibition buatsaih an tlawh an tum a, he hunah hian State Icons, PwD Voters leh thalai vote neite kawmin hun an hmang dawn a ni.

An cham chhung hian Mizorama inthlan kaihhnawiha inhnamhnawih mi pawimawh te an kawm a, political party aiawhte bakah Sawrkar agency leh Department, inthlanna muanawm leh felfai, mitin ban phak, huapzo leh telna kumin kum tawpa neih tura mawhphurhna neite an tel a, inthlan hun tur tak erawh Election Commission of India in a la rawn hriattir leh dawn a ni.

Nimin khan political parties aiawhte kawmin an ngaihdante an zawt a, rawtna leh ngenna thlente an ngaihthlak sak a. Hemi hnu hian enforcement agencies hrang hrangte atangin inpuahchahna an kalpui tawh dan tlangpuite an ngaithla leh a, Chief Election Commissioner chuan State leh State inkalpawhna ramri, a bik takin thenawm State nena inrina Interstate Check Post kaltlanga dan phal loh sumfai, zu, damdawi leh vote zawn nana a thlawna thil sem chhuah tur ang chite ngawrh lehzuala veng turin a hriattir a ni. 

Hemi hnu hian Chief Electoral Officer, State Police Nodal Officer leh CAPF Nodal Officer-te kawm ve lehin inthlanna neih tura inpuahchahna tlangpui leh thlen tawh chinte an zawt a, venhim hna thawktu tur leh ruahmanna siamte chu an zirchiang bawk a ni.

Vawiin hian Mizoram chhung District hrang hrang 11 a District Election Officer leh Superintendent of Police theuhte kawmin an hmalak dante District Election Officer hnen atangin an ngaithla a. Election Comission Team chuan District Official-te chu tun aia vote thlak an tam zawk theih nana tan la tur te, a hmei a pa, thalai leh khawpuia chengte'n vote an thlak uar lehzual nana SVEEP Campaign leh District mila hmalak ngaih bikna laiah tan la turin a chah bawk.