Aizawl August 14, 2024: Khuarel chhiatna avânga in leh lo chante leh thenawm ram atanga sahimna zawnga Mizoram-a raltlan 45,000-te tanpuina tur buhfai MT 1379.34, Vaibêlchhe 5 man hu sawrkâr laipuiin Mizoram Sawrkar hnena a pekna lehkha chu vawiin khan Ministry Of Home Affairs hnen atangin dawn a ni.

Chief Minister Lalduhoma chuan, "Mizoramin khuarel chhiatna kan tawh avanga in leh lo chante leh thenawm ram buaite atanga kan unau raltlan mi thahnem tak kan neih avanga Mizoram buhfai mamawh a san thu hi Dt. 6.8.2024 khan sawrkâr laipuia hnenah a lo thlen tawh a. Food Civil Supplies & Consumer Affairs changtu Minister B.Lalchhanzova’n he hmalakna hi bawhzui zelin, Minsitry of Home Affairs chuan, Ministry of Consumer Affairs, Food and Public Distribution kaltlangin Mizoram sawrkâra Food Civil Supply & Consumer Affairs thuneitute hnenah Central Sawrkarin Mizoram tana a bika buhfai mamawh pek a nih thu hi ziakin an rawn hrilh ta a ni. FCI hnen tangin Supply Department hian lehkha hmuh atanga ni 60 chhungin buhfai hi an la chhuak thei dawn a ni," a ti.

"Khuarel chhiatna leh politics thil avânga mahni in lum pawh luah thei lova rilru baihvai taka tangkhang mêkte ngaihtuah a, ei tur buhfai an neih ngei theihna tura hmalatu Mizoram Chief Minister leh FCS&CA changtu, Minister of State B. Lalchhanzova hmalâkna hi ZPM Party chuan ropui kan ti a, Sawrkar laipui chungah lawmthu kan sawi bakah FCI leh FCS&CA a thawk Sawrkar official ten Mizoram Sawkar hmalakna a hlawh tlin theih nana theih tawp an chhuah thin hi lawmawm kan ti hle a ni," a ti bawk.