Aizawl August 12, 2023: Vawiin khan Zomi Council Steering Committee hruaitute chuan Chief Minister Zoramthanga chu a pisaah an hmu a, tunhnai mai ni lo, hun rei tak ata tawh Manipur zofate tana a lo thawh tawh thinnaah lawmthu an hrilh.

Zoramthanga hian Zomi Council Steering Committee hruaituten an ngen angin an kal zel dan tur thurawn a pe a. Mizoramin inthlanpui a hmachhawn dawn avangin engkimah lo tanpui nghal zat zat a harsa palh thei a, amaherawh chu mipuite mamawh an tihsak theih awm apiangte chu theihtawpin sawrkarin a ngaihtuah dawn tih a hrilh a, a tul anga be pawp zel thin turin a chah a ni.

Zomi Council Steering Committee-te hian, buai tirh phat atangin an mamawh engkim Mizoram atangin an chawlut vek a, mipui mamawhte tluang taka an lak theih nan Mizoram sawrkarin Tuivai lei a siamthat sak a, Daido lam kawng a chei sak a, Hliappui to Kawlkulh kawng siamthatna a ruahman bawk a. Mizoram mipuiten an hmangaih em em a, Media hmun tinrengah an tanpui a; Mizoram MP pahnih C. Lalrosanga leh K. Vanlalvena ten an tan Parliament-ah theihtawp an chhuah reng bawk avanga an lawm thu leh an thla a muang thu te an hrilh a, hei vanga lawmthu sawi chu an hmuh chhan ber a nih thu an hrilh.