Aizawl: Chief Minister Zoramthanga chuan nimin khan Mizo Hmeichhe Insuihkhawm Pawl (MHIP) Zemabawk Branch ten Zemabawk YMA Hall-a MHIP Day vawi 45-na an lawmna a hmanpui.

Chief Minister chuan kalkhawmte chu MHIP Day chibai bukin, chhungkua leh khawtlang nun a hmeichhia an pawimawh thu a sawi a. Chhungkaw tinuamtu ber an nih thu te, an tawngka chhuak leh mi dangte nen an indawr danah thui takin hlimna leh hlim lohna thlen theitu an nihzia hre reng turin a chah.

Chief Minister chuan tunlaiah zu leh ruihhlo in chhungkaw tam takah harsatna a thlen thin thu sawiin, chutianga buai chhungkuate chuan Pathiana beiseina nghat tlat thin tura chahin, sawrkar pawhin ruihtheihthil avanga buai, dam duh te enkawlna tur siamin hma a lak mek thu a sawi. MHIP Day lawmnaah hian Zemabawk MHIP Branch te chuan vengchhunga vohbikte leh kum 70 chunglamte hnenah thilpek hlanna hun siamin, Chief Minister chuan heng thilpekte hi a hlan a. Chief Minister hnenah hian Zemabawk branch MHIP te hian CM Relief Fund a chhun luh turin Rs. 5000 an hlan bawk a ni.