Aizawl: Naupangte humhim a, an dikna leh chanvo bakah an hamthatna neih kawhhmuh tura hma latu Childline-in case an buaipui zingah naupang ngaihsak loh an tam ber.
Zalen palaiin a kawmnaah Childline thawktute chuan nikum 2017-2018 a case an neih/buaipui 210 leh 2018-2019 January thla thlenga case an buaipui 156 zingah naupang ngaihsak loh an tam ber tih an sawi a. Naupangte hi an inah ngei kalin an dimhmun an zirchian hnuah an buaipui chhunzawm thin tih an sawi a. Naupang chu an nu leh paten ngaihsak lo mah se an chhungte enkawltu tur an awm chuan enkawl se an duh ber tih sawiin a tul tawpah lo chuan Home ah an dah ngai lo niin an sawi.
Childline thawktu te chuan naupang ngaihsak loh dawtah hian naupang khawih an tam hle tih an sawi a. Naupang khawih zingah hian kutthlak leh mipat hmeichhiatna rawng kaia khawih an awm tih sawiin heng zinga a tuartu tam zawk hi hmeichhia an ni tih sawiin mipa pawh engemaw zat an awm niin an sawi. Naupang harsatna tawk hi veng tin deuh thaw ah awm mahse a bikin veng chengker leh penhlelh deuh ah te, nu leh pa ruitheih thilin a tihbuai zingah leh lehkha zir sang lo zingah a hluar zual niin an sawi.
Naupang chunga harsatna chu state dangte ngaihtuahin Mizoram ah chuan a tlem hle nia sawiin hei hi Kristian ram kan nih avanga intihmualpho kan hreh vang nia an hriat thu Zalen an hrilh a. An hmalakna ah naupang himna an ngai pawimawh ber nia sawiin naupang pawhin an hlawkpui hle niin an sawi bawk.
Childline te hian JJ Act in a huam chin naupang kum 18 chin hnuailam an buaipui thin a, an ni bakah hian District Child Protection Unit (DCPU) in an buaipui bawk. Naupang harsatna tawk te tan Phone Number 1099-ah a thlawnin biaktheih a ni a. Phone hi Kolkata ah dah a niin darkar 24 chhung hna thawk tura tih a ni a; mahse, Mizo thawk an awm loh avangin phone hmanga harsatna thleng kawngah buaithlak chang a awm thin a, February thla chhung hian thawktu hi lak fel hman tum a ni.