Khawvela mihring tam berna ram China-ah chuan kum 60 hnua a vawi khat nan mihring awm zat pung loin a tlahniam. China-ah hian kum 2022 khan mihring tluklehdingawn 1.4118 an awm a, kum hmasa aia an tlemna hi 850,000 lai a ni - Mizoram mipui zat dawn lai a nih chu.   

China-ah hian naupiang zat an thlahniam nasa hle a, hei hian nghawng a nei chho ta a ni. Mi 1000 zela naupiang awm zat chu -6.77 laiin a tlahniam a, mitthi an pun ve zel bawk si avangin pun lam aiin kiam lam an pan ta a ni. China-ah hian 'one-child policy' kalpui a lo ni tawh a, hei vang hian naupiang zat hi a tlahniam nasa hle. 

China National Bureau of Statistics chuan data thar a tichhuak a, heta tanga a lan dan chuan kum 2022 chhung khat naupiang hi kum 2021 aiin a hniam zawk a, mi 1000-ah 7.52 zel piang ang an ni. Hetih lai hian kum 2021 chhung vek khan US-ah chuan mi 1000 zelah naupiang 11.06 awm anga a ni a, UK-ah pawh 10.08 a ni. 

China hian kum 1976 hnuah a vawi khat nan kum khat chhunga thi zat an tam ber tum a tawng bawk a, mi 1000 zelah mi 7.37 thi ang an ni.