Aizawl January 2, 2023 : Aizawl Superintendent Of Police C. Lalruaia, MPS leh Aizawl Traffic Superintendent Of Police, Senior SP Rodingluaia Chawngthu, MPS te hnen atanga ZALEN thudawn danin nikum Christmas leh kumin Kumthar lawmna vuakvetah buaina liantham a thleng lo a, an hriat chinah a ralmuan ber tum niin an sawi.

Hetihlai hian Kumthar lawmna-a halmawi leh halpuah kawl leh hal kaihhnawih-ah mi 28 man niin case 26 siam a ni a, heng zinga mi 12 te hi hal avanga man niin 16 te hi zuar/kawl vang man an ni. Aizawl SP chuan case awm belh theih a nih thu a sawi a, thlalak leh video an hmuh atangin mi dang man belh tur an awm niin a sawi.

Zu leh Ruihhlo kaihhnawih-ah kum dang zawng aiin mihring man tur an tlem tih a sawi a, man tur mumal an awm loh thu leh Thana lock-up a dah tur pawh an tlem hle tih sawiin, ruibuai buaipui tur pawh an awm lo niin a sawi. Rangvamual lama duty te pawhin kum dang ngaihtuah chuan mihring an tlem hle tih a sawi bawk.

Traffic SP Rodingluaia pawhin nikum leh kumin hunpui boruak chu a dai hle tih a sawi a, motor tlanchhuak an tlem piah lamah dan bawhchhia an tlem thu a sawi bawk. Kumthar ruaitheh zanah chhuak an tam a ti a, kawnchei en leh kawncheina hmuna concert chhim te an nih thu a sawi. Traffic SP chuan a hriat theih chinah tun anga khawpui a ralmuan hi a la hriat ngai loh thu a sawi bawk.