Aizawl: Mizorama thalai inkhawmpui lian ber, Kristian Thalai Pawl (KTP) General Conference vawi 59-na, Diakkawn Field, Kolasib-a nghah, May 5, 2022 atang tan zanin hian a tiak ang. Kumin conference-ah hian kumpuan thupuiah Kawlkulh Bial rawtna, ‘Tawngtai tam’ tih chu pawm a ni. 

Conference vawi 59-na thupuiah ‘Tunlai thil awmzia’ (Rom 13:11) tih hman a ni a, Speaker atan Revd Chuauthuama, Ramhlun Vengchhak hman a ni.

May 5, 2022 kha palai thlen kim ni a ni a, zanah Palai Lawm Inkhawm neih a ni a. May 6, 2022 khan Rawngbâwlna Report Inkhawm neih a ni a, chawhnuah Fakna Inkhawm neih a ni thung. Zan Pathian Biak Inkhawmah Rev. Dr. K. Lallawmzuala, Executive Secretary i/c KTP-in Pathian thuchah a sawi a, inkhawm banah Fellowship neih a ni.

Inrinni zingah kum 2022–2024 chhunga Central KTP hruaitu thar thlan a ni a, thlanchhuah te chu: 1. Upa Johny Lalawmpuia, Armed Veng; 2. H. Rosangzuala, Bawngkawn; 3. C. Hmingthanzauva, Bungkawn; 4. Lalruatfela, Chaltlang; 5. L.V. Lalthantluanga, Chanmari; 6. Lalrempuia, Chanmari West; 7. Vanromawia, Chhinga Veng 8. F. Lalremruata, Dawrpui; 9. K. Lalfakzuala, Dawrpui Vengthar 10. Lalnunsanga, Durtlang; 11. Rinsailova Sailo, Electric Veng; 12. R. Lalmalsawma, Khatla; 13. Jonathan Lalhruaitluanga, Kulikawn; 14. Upa F. Zoherliana, Luangmual; 15. Rossi Lallawmawma, Mission Veng; 16. C. Lalkhawngaiha, Mission Vengthlang; 17. C. Lalbiakmawia, Ramhlun North; 18. T/Upa Robert Lalrinawma, Ramthar; 19. Malsawmdawngliana, Republic Veng; 20. T/Upa Lalbiakthuama, Tuikual; 21. PC Lathanmawia, Vaivakawn; 22. T/Upa P.C. Vanlalnunmawia, Venghnuai; 23. Upa Lalchharmawia, Zemabawk North; 24. F. Lallianzuali, Zonuam leh 25. T/Upa T.C. Lalremsiama, Zuangtui te an ni.

Inthlan zawh hian Conference rorel inkhawm neih chhunzawm a ni a, tun tumah hian General Agenda 10 chhawpchhuah a ni a, Central KTP Leader Rev. Vanlalmuanpuia Khiangte chuan rorel hi a kaihruai. Kumpuan thupuiah Kawlkulh Bial rawtna “Tawngtai tam” tih chu pawm a ni a, Kohhran Humhalh Chungchang inzirtirna neih te relin, neih inang inkawp chungchang inzirtirna kawnga hmalak rawtna bial panga atranga lut chu Kohhran hmalak mekna anih angin a hrana ruahmanna siam a ni lo. Myanmar raltlan chhawmdawlna chungchang pawh Synod hmalakna anih avangin a hrana hmalak loh te an rel a, kum 2026 Khawmpui thlengtu turin Saitual thlan a ni a, kum 2022-2023 Budget atan nuai 66 leh sing 1 an pawm bawk. 

Nimin khan Multiples Programme hman a ni a, Kolasib Diakkawn Kohhran Biak Inah ‘Ram leh hnam siamthat kawnga thalaite mawhphurhna’ tih thupui hmangin Rev. V.L. Luaia Hranleh, Executive Secretary, Mizoram Synod-in thuchah a sawi a, Kolasib New Diakkawn Kohhran Biak Inah ‘Kristian Thalai - Chhungkuaah’ tih thupui hmangin Upa R. Lalhmingthanga, Republic Vengthlangin thuchah a sawi. Kolasib Venglai Kohhran Biak Inah ‘Nupui Pasal Inneih’ tih thupui hmangin Upa Prof. H. Lalthanzara, Nursery Vengin thuchah a sawi thung.  Chawhnuah Variety Programme neih a ni.

Inrinni zan inkhawm atangin Conference thupui ngaihthlak tan a ni a, Revd Chuauthuama hnen atangin Pathian thuchah ngaihthlak a ni ang. Inkhawm banah Fellowship neih leh a ni.

Vawiin chawhma leh chawhnuah Speaker hnen atangin Conference thupui ngaihthlak a ni leh ang a, zan inkhawmah Synod Moderator Rev. Dr. Vanlalnghaka Ralte-in kum 2022 - 2024 CKTP hruaitu thar hlanna hun a hmang ang a, CKTP Leader kal chhuak Rev. Vanlalmuanpuia Khiangte-in Pathian thuchah a sawi.