Aizawl;  NEUM-ten July 11-13, 2022-a mass casual leave lak an tum chungchangah mipuite hriatthiamna an ngen tih an thuchhuakah an tar lang. An casual leave dil erawh hotu sang lamin pawmsak lo turin Controlling Officer-te an hriattir niin National Health Employee Union Mizoram (NEUM) hruaitute chuan ZALEN an hrilh.

NEUM-ten mass casual leave lak an tum chunchangah hian member thenkhatten casual leave ni thum atana lak dilna chu Controlling Officer thenkhat chuan an phalsak lo niin thu dawn a ni a, chutih rualin phalsak te pawh an awm ve bawk a, phalsak te hi hotu sang lamin phalsak lo tura an tih hmaa an lo phalsak hman tawh niin hriat a ni. 

NEUM lam chuan thuneitu sangte laka nuar an nih avangin mass casual leave hi phalsak lo sa an ni thu an member-te an hriattir. An chungah eng pawh thleng se ngaih-thah an nih dawn lo tih leh dilna an thehlut tawh angin ngaihtha taka awm turin an memberte an hriattir.

“Tanrual hun a ni,” tiin a tawp thlenga tang thei turin an member-te an chah a, an pawl member-te chu an pawl thuchhuak chauh ngaihchang turin an ti a ni.