Aizawl : Cleanliness Trekking Expedition nei tura Lailapur atanga Khaykhi, Siaha District ke a kal tum Valallawmzuala Varte, Mission Veng Aizawl chuan Zirtawp zan khan Lunglei a thleng a, tukin zing khan Lunglei chhuahsanin Lawngtlai a pan.

Vanlallawmzuala Varte hian he expedition ah hian ke hlira hun a hman piah lamah hian a kalna kawng dung a bawlhhlawh paihhnawk awm te, a bik takin plastic bawlhhlawh te a chhar fai nghal zel a. LZ-a hi Hruaizela, Sairang chuan motor a zuiin a bawlhhlawh chharsa te ani hian a lo phur khawm thin bawk a ni.

Vanlallawmzuala Varte hian May ni 23, 2023 atang khan Lailapur atanga kal tanin Khaikhy khua atanga km 10 vela hla Myanmar ramri bul thleng ke a kal a tum thu an sawi a ni. 

UD&PA Department, Lunglei chuan LZ-a hi lo dawngsawngin, a bawlhhlawh chhar khawl tawh te a paihna hmun taka paihsak turin Garbage truck in an lo lak chhawnsak a ni. DUDO, Lunglei aiawhin Er. K. Laltanpuia'n a kalkawng ei in senso phuhruk na tur sumfai a hlan bakah UD&PA, Department Lunglei buatsaih tui bottle leh key chain an hlan tel bawk.