Aizawl May 20, 2023 : Vawiin khan MNF chuan Mizo Hnam Run-ah chhung inkhawm a nei a, MNF General Secretary Lalremruata Chhangte chuan thusawiin, CM Adviser te leh an puibawmtute enkawlna chu kum nga chhung chuan nuai 1000 dawn a tlin tur thu a sawi.

Lalremruata Chhangte chuan, "ZPM inzawrhna thenkhat, an sawrkar chuan sawrkarin sum a puk lovang an ti a, Thla 4 chhung leka cheng vbc 1258 an puk hman te, CM-in portfolio engmah achelh lo ang ti mah se, Portfolio paruk a chelh mek te, Electric bill leh bill dangte kan ti sang dawn lo an ti a, hei pawh hi an tawngkamah chuan an tihniam a, amaherawh chu atakah asang hle thung si te hi mipui zah lohna lian tak a ni. In renchem tlangau pui siin, CM adviser pawh 5 ngawt ruatin, anmahni puibawmtute thla bi hlawh ringawt pawh thla khatah cheng nuai 15 chuang a ni a, kum 5 chhung chuan cheng nuai 1000 dawn sen ral a ni dawn a ni," a ti a.

Maremruata chuan, "ZPM sawrkar piantirhah thiamlohna nei miah lo, ASI leh SI chhuichiang hmasa lo a an suspend ringawt te kha kan Police te an rintawk loh zia a lang chiang hle a, police in dan mumal tak a nei a. Mimal account Instagram-ah mahni duh thu thu a, kan ram hruaitu ten action an lakna an post te khan kan police te a zah loh zia, a ti lang chiang hle in ka hria a, ASI leh SI an suspend pawh tunah chuan Dan hmaah chuan thiam an chang leh ta si a, chuvangin thil hre chiang hmasa lo a rak vak hi sim vat turin ka duh," a ti bawk.