Aizawl January 4, 2023: Delhi-a sawrkar laipui thuneitute dawra cham mek Chief Minister Lalduhoma chuan tun tuma a zinnaah hian a private Secretary bak official dang hruai a nei lova, he thu buatsaih lai thleng hian Prime Minister pakah Union Minister pahnih a hmu tawh.

External Affairs Minister of India, Dr. S. Jaishankar chu Chief Minister hian a hmu hmasaber a, hemi hnu hian Prime Minister Narendra Modi a hmu leh a, Union Minister of Road Transport & Highways a tlawh tum hi chuan Delhi lama cham mek Chief Secretary Dr. Renu Sharma, IAS, Delhi Mizoram House Resident Commissioner Garima Gupta leh Alex Chawngthu, Addl. RC ten an tawiawm a ni.

Chief Minister Lalduhoma hian Union Minister of Road Transport & Highways, Nitin Gadkari chu a chenna inah a hmu a. Mizoram kawngpui hrang hrang Ministry of Road Transport hnuaia thawhte chungchang sawi puiin chak zawka hmalak a duh thu a thlen.

Union Minister hian sumah harsatna a awm loh tur thu a lo hrilh a. Amaherawh chu Mizorama kawngpui siam hnaah pending tam tak a awm thin chu a ngaimawh thu a lo hrilh a. Chief Minister chuan a kaihhruai sawrkar thar chuan chak takin hma a la dawn a, an achievement pawh lo ena lo ngaihven turin a hrilh a ni.

Chief Minister hian NHIDCL in kawngpui an siamnaah environment an tihchhiat nasat thu Nitin Gadkari hnenah hian a thlen bawk a. Tun hnuah chuan Environment ti chhe lo thei ang bera hna thawh an tum tur thu Union Minister hian a lo hrilh a ni.