June 6, 2022; Champhai Grape Growers Society chuan, chief minister hnenah wine rules pangngai tak a rang thei ang ber a siamsak tura ngenna tunhnai khan an thlen. Hetihlai hian sacramental wine chungchanga inremna thuthlung, Hnahlan/Champhai Grape Growers Society nen a ziak - 'Baptist Church of Mizoram' (BCM) chuan, grape atanga siam, sacramental wine kawl an nei tam tawh lo a, thla khat tla emaw vel chauh an kawl tawh nia thudawn a ni.

Champhai Grape Growers Society hruaitute hnen atanga ZALEN thudawn danin, June ni 2 leh ni 3 khan Champhai bialtu MLA pahnih, Dr. ZR. Thiamsanga leh TJ Lalnuntluanga te chu hmuin, an mamawh hmasa pathum an thlen a, chief minister hnen a wines rules pangngai tak a rang thei ang ber a siam sak tura ngenna, an bialtu MLA te kaltlangin an thawn nghal bawk.    

Grape Growers Society hruaituten an mamawh hmasa 3 an thlen te chu - May ni 27 a champwine an man te a bo a vang awm lo a, rang taka pe let tura an ngenna te, kumin 2022 a an grape thar te winery a an lak ngei theihna atan a, winery a grape awmsa te tihral zung zung a nih theihna tura hmala tura ngenna te bakah, BCM te nen sacramental wine chungchanga inremna thuthlung (agreement) an ziah, a kal zel theihna tur a hmala tur leh 'aw' nei tura sawrkar ngenna te a ni.

Grape Growers Society hruaitute sawi danin, tunah hian an winery ah tanky 30 awmin, chung zingah tanky 5 emaw chauh ruak a awm a, kumin ah tanky 20 vel thar theih an inbeisei. Hengte vang hian tuna tanky a grape tui sawrsa te chu tihral a nih loh chuan grape rah lei kawngah harsatna an tawk dawn.

Hetihlai hian sacramental wine chungchangah ZALEN zawhna chhangin BCM General secretary Rev. R Lalbiakliana chuan tun dinhmun ah bur (um) 500 bawr vel chauh kawlsa an neih thu leh, chu chu thla 1 daih emaw vel la ni turah a ngai tih a sawi. Tualchhung kohhran lamin lakkhawlsa te pawh an neih ve bawk thu a sawi.        

Sawrkarin a khap zel chuan buaithlakna a awm dawn thu te, anmahni (grape grower society) te nen pawh an inbiak thu te, sacrament chu tawp thei a nih loh thu leh kal zel tur a nih thu te society lam an hrilh tawh thu sawiin, Rev. R. Lalbiakliana chuan, anni (society) lam chuan an hmalakna lo ngaichang turte, sawrkar an dawr zel thu te an lo hrilh niin a sawi.