May 9, 2023; India hmarchhak state pariat (8) chief minister zing a social media (a bikin instagram hmang) te ah, Mizoram CM IG page chu comment section off awmchhun niin a lang a. Hetiang a nih nachhan hi social media (IG) hmangtu mipuite vang nge ni ang a, CM hian  comment awm kher hi tul a ti lo ni ang le.?

India hmarchhak CM pariat, Assam CM, Himanta Biswa Sharma, Manipur CM N Biren Singh, Meghalay CM Conrad K Sangma, Tripur CM Dr. Manik Saha, Nagaland CM  Neiphiu Rio,  Arunachal Pradesh CM Pema Khandu leh Sikkim CM Prem Singh Tamang leh Mizoram CM Zoramthanga te'n IG ah official page an nei vek a ni.

Mizoram CM tih loh state dang CM ten an page ah comment section a pangngai anga an kalpui vek laiin, Mizoam CM page erawh comment section off a ni a. Hetihlai hian Nagaland CM Neiphiu Rio tih loh zawng CM dangten blue tick an nei vek a. Nagaland CM hian IG ah page nei tho mah se, regular takin IG page a hmang lo ni-ah a ngaih theih thung.

Mizoram CM Zoramthanga IG page hi hun engemawchen chhung comment section 'on' niin, nikum January 13, 2022 hnu atangin comment thei hloh turin 'off' a ni.

Hetiang a Mizoram CM IG page comment section off a nih nachhan hi social media hmangtu mipuite vang nge ni ang a, CM hian comment kher hi tul a ti lo ni ang ? Engnge kan ngaihdan le ?

Hetihlai hian CM Zoramthanga official IG page hi tangkai tak a hman niin, sawrkar hmalakna hrang hrangte, a mimal chungchangte, khua leh tui te tawrhpuina leh lawmpuina thu te tarlanna atan tangkai taka hman mek a ni.