Aizawl: Chief Minister Zoramthanga chuan nimin khan Lengpui Airport ah kalin Airport tih-changtlunna tura hmalakna kal mekte enpuiin, ruahmanna siamte chu Airport Authority of India (AAI) aiawhte leh Aviation Department hotute nen an sawiho.

Lengpui Airport tih-changtlunna tura hmalakna kal mekte hi thlawhna park-na area zauh, thlawhna hijack emaw chhiatna dang a thlen thulha airport-a thlawhna dang tibuai lova a hranga park-tirna tur hmun siam, thlawhna thlawk chhuak tur engine fail a awm palh pawha accident a thlen loh nana runway tawpa zawl thui zawka siamte an ni.

Runway bul a awm mek DVOR (Doppler Very High Frequency Omni Range) Long Range Navigational Aid chu Hmunpui khua tlangchhip ah a dang vuah tura hmalak mek a ni. Heng hmalakna hrang hrang palite hi kum kalta atanga hmalak tan niin tunah hian DoNER Ministry atanga sum hmuhin a daih loh avanga la zawh loh a ni a. State atangin sum engzat nge he hna zo tur hian sen belh ngai dawn tih te thlithlai nghal a ni.

Heng bakah hian runway tihsei belh theih dan tur leh runway surface khawk tawh leh rualrem lo lai te cheithat dan tur te a hmunah Chief Minister hian a en nghal a ni.