Aizawl August 12, 2024 : Vawiin khan Chief Minister Lalduhoma chuan a office-ah Synod Social Front hruaitute a kawm a, Lokayukta, CBI hnena general consent pek leh retricted tender chungchanga an hmalakna te a lo hrilh.

Chief Minister hian eirukna tibo tur leh eiruk chingte chunga dan anga hmalak anih theih nana Lokayukta an thuam chak chhoh mek dan te, India dan tharin a phut ang thlapa CBI hnena general consent an pek thu te, restricted tender chu dan ang thlapa kalpui an tum thu te social front hruaitute hi a lo hrilh a. Revised estimate siam hi project date of completion pawhsei nen a kal kawp duh hle a. A hunah hian heng thil pahnih hi tihbo an tum thu a sawi.

Revised estimate umzuitu tur mipui huapzo Project Monitoring Committee an din tih a lo hrilh a, "Team paliah insem darhin endik hna an kalpui mek a. Anni'n engkim chipchiar leh uluk taka an endik hnua an remtihsak hnenah chauh project cost revised leh date of completion pawhsei hi kan phalsak dawn a ni."

"Contract hralh chhawn pawh hi tihbo kan tum a, tunah chuan han hralh sawi tur pawh a awm rih lovin kan hria. Chutihlaiin contract hi a hmu ngaiin an hmu tluk tluk thei bawk. Heng thil fel tawk lo awm thei te tibo tur hian hma pawh kan la mek," a ti. Chief Minister hian sawrkar chu kohhran te thurawn leh zilhna te ngaithla turin a inhawng a, inthlahrung lo turin Synod Social Front hruaitute hi a chah a ni.

Synod Social Front hruaitute hian, "Kohhran chuan sawrkar hi tha taka thawhpui che u kan duh a. Mipui sawrkar tih ri ringawt pawh hi a mawi a ni. Chutihlaiin sawrkar kalphungah sawisel tur a awm chuan kan sawi hreh dawn chuang lo. Vawiinah hian Synod in Corruption do a lo rel te bawhzuiin sawrkara thlen tur chi kan neih te kan rawn thlen a.'

"Lokayukta tihchak te, restricted tender chu loh theih loh chauh kalpui te, project cost ennawn (revised) tihbo te, contract hralh chhawnleh tihbo te tha kan tih thu hi kan rawn thlen a n. Heng thil te hi sawrkarin kalpui a tumsa leh a kalpui mek te an ni tih kan hria a, kan lawm hle a ni," an ti a. Eurukna do tura kohhran huang chhunga hma lak an tum dan te pawh Chief Minister hi an hrilh bawk.