Aizawl: Chief Minister Zoramthanga chuan "Kei chu pa ber, a tawp na ka ni a, a chhiat a thatah ka mawh a ni, chhungkaw budget ah chuan pa a thu tur a ni," tiin, a mimal ngaihdanah chuan Chief Minister in finance a enkawl chu tha a tih thu a sawi.

Assembly budget session neih zawh tak a, a demand khaikhawmna March ni 9, 2022 ah he thu hi sawiin, CM Zoramthanga chuan state lian West Bengal, Maharashtra leh UP ah te chuan hna a tam lutuk tih sawiin, CM tan finance en sen a nih loh thu leh Finance minister hran emaw, CM pawhin lo enkawl se, finance ah puitu an siam ngei ngei a ngai tih a sawi a, hetihlai hian keini ang state te reuhte, rel fel pawh awl em em angah chuan CM in finance a enkawl chu a lo experience tawh atangin tha a tih thu a sawi.

"Finance minsiter dang nei ila, tun ang kan pawisa crisis ah te khan CM ngaituahna tello chuan tuman an ti ngam dawn lo reng reng," tiin, "Chuvangin kei chu pa ber, a tawpna ka ni a, a chhiat a thatah ka mawh a ni a. midang bel tur an awm chuang lo," a ti bawk.

CM Zorama chuan, "Engemaw thil ah min puitu tur Minister of state emaw, minister pangngai emaw an awm pawh tha ka ti tho," ti bawkin, harsatna lian tham a lo thlen phei chuan mawhphurtu tawp ni lo, midang tan khawih a hrehawm thin thu leh experience a lo neih tawh atanga tha a tih angin a sawrkarah an la kal zel thu a sawi.

Midangin an sawrkar (party dang sawrkar) ah finance minister dang neih tha an tih chuan tha a tih tho thu pawh sawiin, hetihlai hian tling/tlak (efficient) taka kal tur chuan CM in finance a enpui phak ngei ngei a ngaih thu a sawi bawk.