Aizawl January 4, 2024: Vawiin khan Chief Minister Lalduhoma chuan Chief Minister a nih hnua a vawikhat nan Prime Minister Narendra Modi chu a chenna inah a hmu a. Inkawmna hun tha tak an nei a, India leh Burma ramri chungchang a sawipui.

Chief Minister hian, "India leh Burma ramri tuna kan hman mek hi a nghawng tur mipuite rawn lova British sawrkarin a siam kha a ni a, keini zofate tan chuan barhluih ramri, kan ram leh hnam min thendarhtu a ni ta a. Chuvang chuan vawiin thlengin pawm harsa kan ti em em a, rorelna pakhat hnuaia awm hi kan duh ber zawk a ni. Tuna raltlana lo chhuk (refugee) te pawh hi kan tan hnam hrang an ni lova kan unau, kan thisen zawmpui te an ni, chuvangin tha tak leh duat taka lo tuamhlawm hi kan duh a ni," a ti.

Lalduhoma chuan Akhand Bharat (greater India) project rual hian Greater Mizoram pawh kalpui ve an duh hle tih Prime Minister hnenah hian a thlen bawk a ni.

Inner Line Permit pawh tuna kalpui mek dan aia tha zawk leh mumal zawk a awm thei nia a hriat thu a thlen a. Prime Minister hian proposal siama a hnena thlen turin a lo chah a ni.

Prime Minister hian duhsakna lo hlanin inhmuh fo a duh tur thu Chief Minister hi a lo hrilh a. Mizoram hmasawn zelna atan kawng engkimah inhawng taka an thawhpui tur thu a lo sawi a ni. Lalduhoma hian Mizoram dinhmun leh hmathlir pawimawhte a hnenah hian a thlen ve bawk.