Aizawl; Chief Minister Zoramthanga chuan Zirtawpni khan CM Conference Hall-ah Dr. Laltluangliana Khiangte lehkhabu (lemchan) ziah, ‘Mi Ngo Nukiri leh a fapa Tlira’ chu a tlangzarh.

Chief minister chuan Mizo literature tihausa belh tur lemchan lehkhabu ziak tlangzarh thar a ni chu lawmawm a tih thu leh history-a thil thleng behchhan a nihna chuan thil thlen dan leh Mizo history chhui zui tham a la awm ngei tih a rawn pho lang nia a hriat thu a sawi a. Literature hausakna mai bakah history zirchian belh duhnate a hrin chhuah belh zel a beisei thu a sawi a ni.

Adviser to Chief Minister C. Lalramzauva pawhin lemchan lehkhabu tlangzarh thar chuan Mizo culture bakah mihring leh khawtlang nun zirchianna ni tel, belhchiantlak nia a hriat thu a sawi.

Mizo lalte khan intiamrualin an chhehvel ramte kha an rûn fo va, kum 1840-1870 inkar, kum 30 chhung vel ringawt pawh khan Chittagong, Burma, Manipur, Cachar, Sylhet leh Tripura te chu vawi 20 vel zet chu an rûn a (Zoram Vartian 35). Kum 1871, Pawlkut thla ni 23-a Bengkhuaia pasalthaten Alexandrapur thingpui huan an rûn a. Chu lai tak chu he lemchan bul intanna tak hi a ni a; a nghawng chhuah ngaihnawm takte chu he lemchanah hian hmuh theih a ni.

Dr. Laltluangliana Khiangte hian lemchan puitling 29 a ziak tawh a, tawng danga lehlinte nena chhiar chuan lemchan 43 tha a ziak tawh a . Chung avangte chuan kum 2018 khan cheng nuai khat keng, Sangeet Natak Akademi Puruskar (Award for playwright) chawimawina a dawng a ni.