Aizawl January 23, 2024: Vawiin khan Chief Minister Lalduhoma chuan a office-ah Mizoram SSA Teachers' Association hruaitute a kawm a, an harsatnate a ngaihthlaksak bakah Zirtirtute chu sawrkar laka thubuai an thehluh mek hnukdawk turin a ngen.

Chief Minister hian zirtirtute dinhmun siamrem an tum dan leh zirna kawnga sawrkar policy tlangpuite a lo hrilh a. An harsatna thlen te chu a changtu department hotute a lo sawipui tur thu hrilhin, engkim inringtawn taka kalpui tha a tih thu a lo hrilh a ni. Chief Minister hian an pawlin sawrkar laka thubuai an thehluh mek chu hnukdawk tura ngenin, sawrkar tharin thinlung tharin an dinhmun a ngaihtuah dawn tiin a chah.

Mizoram SSA Teachers' Association te hian Chief Minister hnenah hian lawmthu an sawi a. A hnathawh zelna turah duhsakna hlanin, a ngenna te chu an pawlin rang taka an lo ngaihtuah tur thu an sawi a ni.