August 22, 2023; Chief minister Zoramthanga'n Lunglei - Tlabung kawng chu NHIDCL kawng a ni tih sawiin, mipui harsatna sukiang turin an hotute leh thawktute an nawr reng thu a sawi.

Vawiin Assembly Session a Nihar Kanti Chakma in calling attention nei a Tlabung kawng chungchang a sawi chhuah chungchangah, PWD changtu CM ni bawk Zoramthanga chuan, Lunglei - Tlabung kawng chu siam lai a ni tih sawiin, fur nen a innang a, chu chuan harsatna a thlen niin a sawi.
 
CM sawi danin, Tlabung kawng hi Lunglei lam atangin km 96 a thui a ni a, BRO in kum 1970 vela an laih niin, 2009 thlengin an enkawl a, kum 2021 Februay thlengin PWD in an enkawl a, chumi hnuaah NHIDCL in tun thlengin an enkawl a ni.

Hrangchalkawn atanga Chhumkhum km 37 leh Chhumkhum - Tlabung km 37 chu package hnih ah then a ni. NHIDCL hnuaiah dah niin, package 'A' Rs. Vbc. 698.45 sanction pek a ni a, 'B' chu Vbc. 740.58 niin, a vaiin Vbc. 1439 sanction a ni.

Kawng hi siam zawh a nih hunah chuan km 96 a thui thin chu km 75 chauh a ni tawh dawn a, package 'A' chu ni 30 12. 2022 leh packge 'B' chu ni 9.1.2023 vel a zo tur a beisei an ni a, amaherawhchu a package pahnih hian 31.12.2024 vel a zawh hman theih beisei a ni ta chauh a ni.

PWD changtu CM sawi danin, hna a tlai chhan bul ber chu conpensation leh forest clearance buaipui chhung rei vang a ni ber a. Tun dinhmunah physical achievement 48% niin, financial achievement pawh 9.9% a ni a, tun a a chhe zualpui laite chu tun dinhmunah chuan km 6 vel a ni. He kawng NHIDCL kawng a nih avangin PWD in tih theih a nei tam vaklo a, amaherawhchu mipui harsatna sukiang NHIDCL hotute leh thawktute nawr reng an ni.

Lunglei - Tlabung kawng project duh anga a chak thei lo chu pawi an ti hle tih sawiin, CM chuan, "Fur pui a ziaawm chhoh chuan chak zawk leh tha zawk a thawh theih a ni ang a, kawng tha tak sial chhuah thuai theih a nih kan beisei a, chumi tur chuan sawrkar lam atangin NHIDCL leh contractor te kan nawr reng a ni," a ti bawk.