ZALEN February 1, 2025 : MNF Thalai chuan Mizoram CM zahawm tak Lalduhoma’n USA a tlawh tuma US President Life Time Achievement Award dawng anga ama official social media platform kaltlanga khawvel mipui hriata official-a a puanzàr chungchâng chu dan ang hriatpui a ni em an ti a, thu dik hria an awm chuan hrilh hre turin an ngen.

MNYF chuan, "CM-in US President Life Time Achievement Award dawng anga ama official social media platform kaltlanga a dah, a hnua a delete (nawh reh) leh chungchâng te, a taka petute hi tute nge an nih chiah te, US President official award a dawn nia sawi chungchâng hi Home Ministry leh Foreign Ministry-te'n dàn angin an hriatpui em tihte leh a kaihhnawih tul dangte kan chhuichiang mêk a. Hemi chungchânga thu dik hria chuan min hrilh thei reng bawk e," an ti.

MNF Thalai chuan chiang zawka thu dik a lanchhuah theih nân a tul chuan National Media Eg. - Republic TV, Times Now, NE TV etc. kaltlanga sawi hona pawh rawt a ni ang an ti a, Washington DC-a Indian embassy leh White House pawh biak pawh an tum tih an sawi.

"US President chawimawina nia a sawi kan CM zahawm takin a dawn dàn leh hlan a nih dàn hi a rei tulh tulh a, a mak kan ti tulh tulh a, Mizo mipuiin thu dik kan hriat a ngai a ni," an ti.