Manipur Zohnahthlak buaina tawh chinfel dan kawng khat chauh a awm pawhin CM in hmalak nghal duh

4th July, 2023; Zoramthanga, Chief Minister chuan Manipur buaina chinfel dan kawng awm apiang dapin, a rang thei ang bera ngaihtuah a ngai tak zet a tih thu CM official tweeter kaltlangin a sawi. Buaina chinfel dan chu kawng khat chauh a awm a nih pawhin chingfel tura hma lak nghal a duh thu tarlan a ni bawk.

Tweeter ah chuan "May thla tira Manipur-a buaina chhuak chu tukin July ni 4, 2023, dar 3:30  thleng hian a la reh lo, ni 62-na a ni ta! Buaina a ziaawm zel kan beisei laiin a punlun ta zawk a, a reh hun tur hriatthiam harsa tak a ni tawh! Manipur buaina avanga hliam tuar leh nunna chan te, in leh lo chante leh buaina avanga harsatna hrang hrang tawkte ka tawrhpui tak zet a, Pathian thlamuanna leh awmpuina ka dilsak a ni," tiin a tarlang a. 

CM chuan sakhaw hmun serh Biak In hal leh khawih chhiat te, tualthahna leh buaina nghawng tawrhna rapthlak tak tak thlalak leh video te hmuh belh tur awm tawh lo se a duh thute, buaina chinfel dan chu kawng khat chauh a awm a nih pawhin chingfel tura hma lak nghal a duh thute tarlan a ni a. 

"Manipur buainaah hian mi tam takin nunna an chan tawh a, thisen tam tak a luang ral tawh a, hliam tuar leh sahimna zawnga hmun dang pan mi tam tak an awm belh zel bawk a, chung zingah chuan ka chipui Zo-hnahthlak tam tak an tel a, kan chipuite tawrhna chu kan tawrhna a nih miau avangin ngawihsan theih a ni lo." a ti bawk.

Zoramthanga chuan buaina chinfel dan kawng awm apiang dapin, a rang thei ang bera ngaihtuah a ngai tiin loh theih loha mawhphurtute tan tun hi chet hun ṭha nia a hriat thute, buaina chinfel dan kawng rang taka ngaihtuah leh chet lak nghal chu mawhphurhna la ngei ngei tura ngaihte mawhphurhna leh an tihmakmawh a niin a ngai. Remna leh muanna a awm thuai nan kawng zawn nghal a duh bawk.

"Manipur, Myanmar leh Bangladesh atanga raltlante leh sahimna zawnga Mizorama rawn tlan lut kan unaute enkawlna leh chhawmdawlna tur Central Sorkar aṭanga puihna kan dil pawh hi a rang lama pek kan nih thuai ka beisei tlat a ni," tiin tweeter ah chuan a tarlang bawk.