Naupang 25-ten badminton an zir mekna, Pullela Gopichand Intensive Training Centre (PGITC), Aizawl chu kumin atan Thawhtanni khan hawn leh tan a ni a. Coach pahnihin an enkawl tawh dawn.

PGITC, Aizawl hi TATA Trusts, North East Initiative Development Agency (NEIDA), Pullela Gopichand Badminton Academy (PGBA) leh Mizoram Badminton Association (MBA) thawhhona hnuaia Ramhlun Indoor Stadium-a kalpui mek a ni.

Kum hmasa lamah coach pakhat, Eddie Lalfelkima’n a enkawl thin a, kumin atan Kotak Pullela Gopichand Badminton Academy (KPGBA)-a coach ni mek, Lalhlimpuia chu Eddie-a pui turin Pullela Gopichand-a’n a dah rih dawn a, coach pahnihin an enkawl dawn ta rih a ni. 

PGITC hi tun hma lam chuan Regional Development Centre tih a ni thin a, nikum October thlaa a hming putu, Gopichand-a’n Mizoram a tlawh tum khan TATA Trusts, NEIDA, PGBA leh MBA te hian ‘Badminton Initiative Mizoram’ tih hnuaiah kum hnih dang thawhhona ziah belhin centre hming pawh hi thlak zui nghal a ni.

PGITC chungchang hi MBA hruaitute pawhin Ningania a office chamber-a Sports Minister Lalnghinglova (Tetea) Hmar an kawm tuma sawipuiin hma a sawn theih nan leh kalpui zel dan turte an thlen tawh.

Mizorama badminton-in hma a sawn zel theih dan sawihova Thawhtannia sports minister pisaa Mizoram State Sports Council hotu te, Tata Trusts hotu leh MBA aiawhte an inkawmnaah pawh tluang taka PGITC a kal chhunzawm zel theih dan tur an sawiho leh bawk.

Kumin atana centre hawn leh tannaah hian MBA vice president, MBA Project Monitoring Committee chairman ni bawk, C. Lalduhawma’n tawngtaiin a hlan a. MBA Honorary Secretary Lalrinzuala Pachuau-in fuihna thu a sawi bawk.