Aizawl May 2, 2023 : MZP General Headquarters, Aizawl Extended OB meeting chuan Mizoram chhunga RUSA hnuaia College hrang hranga hmasawnna hna thawh mekte dinhmun an thlir a, RUSA hnuaia College hrang hranga hmasawnna hna thawh mekte hi June 2023 chhung ngeia zo hman vek turin hnathawktute an ngen.

MZP chuan Sawrkar thuneitute leh building sak hna thawktute hemi chungchang hi a sawipui tawh a. An harsatna te leh College zirlaite atanga an thu dawnte an ngaihtuah hnuah RUSA Fund hmanga College building sak mek, sak zawh hun tur pel tawhte chu June 2023 ral hma ngeia sak zawh vek turin an ti a ni.

RTI zawhna sawrkarin a chhan danin, RUSA Fund hmanga hna thawh mekte hi March 2023-a zawh hman tura ruahman a ni. Hna te hi Skyridge Construction & Consultancy Services, Aizawl leh SR Tochhawng Traders, Aizawl te’n an thawk a ni.

MZP Assembly 2022, Darzo-a neihah khan, “RUSA kaltlanga college hrang hrang sak that/ thawmthat hi a hun taka zawh a nih theih nan hmalak ni rawh se,” tiin a lo rel tawh a, an thu rel hi an bawhzui chho zel a ni.