June 7, 2022; Academic session thar, 2023-24 atanga sawrkar sikul te'n uniform inang an neih theihna turin hmalakna a kal mek a, Education director Dr. H. Lalthlangliana chuan sawrkar pawmpui turin rawtna an thlen tawh tih ZALEN a hrilh.

ZALEN zawhna chhangin Education director chuan uniform chungchang sawrkar a an thlen chu rawtna a la nih thu sawiin, pawm a nih chuan sawrkar sum a enkawl sikul ah te rawtna an thlen angin uniform inang tlang hman a nih tur thu a sawi.

Academic session thar, 2023-24 atanga uniform inang tlang hman tur chungchangah inbuatsaihna a kaltluan zawk theihna turin ruahmanna peihfel ran an duh tih education director chuan sawi bawkin, kumin June emaw July thla chhung emaw ah chuan peihfel hman tum a nih thu a sawi bawk.

May 20, 2022 a education minister leh hotu sang zawkte lo rel tawh bawhzuiin, Director, school education chairman na hnuaiah, association hrang hrang, Mizoram Primary School Teacher association (MPTA), Middle School Teachers Association (MMTA), Mizoram Secondary School Teachers Association (MISSTA), Higher Secondary School Lecturer Association of Mizoram (HISSLAM), Mizoram Work Experience Teachers Association (MWETA) leh Mizoram Independent School Association (MISA) te kal khawm chuan common school uniform turah duhthlanna an siam fel a ni.

Sawrkarin a pawm (approve) tura rawtna an thlen ang chuan, primary ah kekawrtlawn leh pawnfen - a dumpawl (dark blue) a ni ang a, kamis var banbul (white) a ni ang. Middle school ah kekawrtlawn leh pawnfen - light grey leh kamis var banbul (white) a ni ang. High school ah kekawrtlawn leh pawnfen dum (black) leh kamis var bantlawn (white) a ni ang. Higher secondary school ah kekawrtlawn leh pawnfen dum (black) bakah, kamis var bantlawn (white) a ni bawk ang. Primary - HSS ah hian T-shirt, school bag leh badge te chu school te duh thlan ang ni turin ruahman a ni.