Aizawl November 26, 2022 : Rural Development changtu Minister Lalruatkima chuan vawiin chawhma khan Mizoram State Rural Livelihoods Mission (MzSRLM) buatsaih State Level Community Led Campaign Against Gender Discrimination chu Mizoram Rural Bank Conference Hall, MINECO, Khatla ah a hawng. 

He campaign hi Ministry of Rural Development hnuaia DAY-NRLM thuchhuak angin India ram pumah November ni 25 atanga December ni 23, 2022 chhung hian hman tura ruahman a ni a, Mizoramah pawh MzSRLM awmna District hrang hrangah hman a ni dawn a ni . He campaign neih chhung hian Self Help Group member te hnenah hmeichhiate chunga hleilenna leh mipa leh hmeichhe inthliarna awm lo tura hmalakna chungchang zau zawka inzirtirna kalpui tur a ni.

He campaign hawnna puala inkhawm tawi buatsaihah hian Rural Development changtu Minister chuan India sawrkarin hmeichhiate dinhmun a ngaipawimawh em em a, chutiang bawkin Mizoram sawrkar pawhin hmeichhiate hamthatna tur a theihtawp a chhuah thu a sawi a. Mizoram chu India state dang te ngaihtuahin mipa leh hmeichhia inthliarhranna ah kan tihthat thu sawiin sawrkar office te, competitive exam ah te leh politics ah te hmeichhiaten dinhmun pawimawh tak tak an luah a ni, a ti.

Minister chuan hmeichhe thliarhranna tibo tura hma kan lak zelnaah inhrilhhriatna - awareness a pawimawh thu sawiin kalkhawmte chu an veng chhung chanchinbu ah vawiina an thil zir chhuah te report pe turin a ngen a ni. RD Minister Lalruatkima chuan sawrkar chu mi harsa leh rethei te tan a ding zel dawn a ni a ti a, Khawtlang, kohhran, tlawmngai pawl te leh department hrang hrang te chu hmeichhiate thliarhranna tihbo a nih theih nan an thawhho a pawimawh thu sawiin MZSRLM chu theihtawpin hmeichhiate laka hleilenna um bo na kawngah hma la chhunzawm zel turin a fuih  bawk a ni.

Vawiina State level campaign hawnna programme hi H. Lalchhandami, CEO, MzSRLM chuan a kaihruai a, Lalliani, General Secretary, MHIP, Lalfamkimi, Advocate & Member, Mizoram State Commission for Women, Lalrinpuia Chenkual, SDPO, Aizawl South leh Vanlalhruaii, Deputy Director, Women & Child Development Department te hnen atangin hmeichhe chunga hleilenna leh mipa leh hmeichhia inthliarna chungchanga hriattur pawimawhte ngaihthlak a ni a. Dr Zomuankima, Chief Operating Officer, MzSRLM  in lawmthu sawina neiin he campaign hawnna inkhawm hi a khar a ni.