Aizawl June 3, 2022 : BJP Mizoram Pradesh chuan vawiin khan BJP State Office, Upper Republic ah Friday Political Session an nei. Vanlalhmuaka, State President chuan, Mahni hminga compensation la ngam si lo, mi hming hawh a Compensation lak teuh tum Minister leh MLA te hian kan ram min ei chhe mek a ni, a ti.

Vanlalhmuaka chuan, “Pu Modi-a kaihhruai central sawrkar chuan kum 8 chhunga India rama hmasawnna a thlen ang hi keini Mizoram State pawh hian hmu ve se tih hi an duh ber a ni a, Kum 2023 MLA General Election lo awm tur ah chuan Mizoram ah hian BJP telna sawrkar a awm ngei dawn a, nimahsela chutiang a thlenna tur erawh chuan BJP member te hi kan pawimawh hle a, BJP hmalakna hrang hrang leh a hnathawh hi mipui hnenah kan tlangau pui zel tur a ni,” a ti.

State President chuan, “Mizoram ah hian Dan awmze nei leh Dan anga hmalakna a kal theih nan keini BJP te hi kan pawimawh hle a, dan ang taka kal ngam sawrkar hi Mizoram hmasawnna atan a pawimawh ber a ni. MNF Pu Zoramthanga kaihhruai sawrkar chu thutiama ding ngai lo a ni a, chuvangin Mizoram mipui hian kan hnawl tawh dawn a ni. Central Minister pakhatin Mizoram ah Kawng  tha pek che u kan tum a, nimahsela a ram neitu Sorkar chuan Kawng  tha aiin Compensation an duh a, hmalakna a chak thei lo tih min hrilh thin chu a mualpho thlak hle a, mahni hminga Compensation la ngam silo mi hming hawh a Compensation lak teuh tum Minister leh MLA te hian kan ram min ei chhe mek a ni,” a ti bawk.

Hmuaka chuan, Modi-a kaihhruai chuan chenna in neilo chhungkua khawpuiah 1.2 crore leh Thingtlangah 2.3 crore kum 8 chhungin in sak sak an ni a, India rama eng chhit tur neilo khua 19,000 te hnenah Eng pek vek anni tawh a, India ram Modi Sorkar hma a tawp tak  thin chu Pu Modi Sorkar hnuah Inthiarna 11.22 Crore pek niin kalpui mek a ni bawk a, Kum 3 chhung lekin 6.2 Crore te tan an inah ngei Tui Connection pek an ni ta, a ti bawk.