Aizawl : Finance Department thu anga Accounts and Treasuries Department hnuaia Special Audit Team ten COVID-19 chungchanga Health Department sum hman dan June ni 18, 2020 atanga an endik tan chu an hriatthiam loh thu thuchhuah siamin an tarlang a. COVID-19 dona kawnga fak hlawh tak Health Minister benghniam tumnaah Congress Party chuan a ngai tih an sawi. Covid-19 dona atana summang nasa ve tho DM&R leh Home te audit ve turin an phut bawk.

Congress Party chuan COVID-19 dona kawnga sum hmang hnem Health Department sum hman dan an endik ang bawk hian sum hmang hnem ve tho, Minister Lalchamliana chan Disaster Management & Rehabilitation Department leh Home Department-te sum hman dan pawh a rang thei ang berin internal audit ve turin Congress Party chuan an phut tlat, tih an tarlang bawk.

MPCC Media Department chuan "Health Department sum hman dan endikna (audit) hi hmanhmawh taka kalpui turin Finance Department hian Accounts & Treasury Department a hriattir a. An endik tan ni, June 18 khan endik an nih tur thu hi Health Department official thenkhat chuan an hre ve chauh nghe nghe a ni," an ti a. "COVID-19 vanga Health Department an buai hle laia internal audit hmanhmawh taka kalpui a ni ta rum rum mai hi a mak hle a. MNF General Headquarters Vice President atanga an paih tak, COVID-19 dona kawnga mipui fak hlawh tak Dr. R. Lalthangliana umzui zelna leh a mah benghniam tumna diktakah kan ngai," an ti bawk.

Chief Minister leh Health Minister inkar chu a fel tawk lo nia sawiin, Health Minister benghniam tumna thil avang mai maia COVID-19 dona kawnga buai em em Health Department hotu leh thawktute'n rilru hnualna tham an tawk chu pawi an tih thu leh mak an tih thu an tarlang bawk.