July 7, 2022; Vawiin a MPCC thuneitu sang, Political Affairs Committee (PAC) thukhawm chuan, Mara Autonomous District Council (MADC) a thil thleng chungchang chu an party 'Disciplinary Action Committee' (DAC) kutah an dah.

Mizoram Pradesh Congress Committee (MPCC) thupuangtu Lallianchhunga hnen atanga ZALEN thudawn danin, MADC a district congress hotute leh congress MDC 4 te insawifiahna chu vawiin khan MPCC thuneitu sang, PAC in a ngaihtuah a, MADC a congress hruaitute leh MDC te chungchang chu an party Disciplinary Action Committee kutah dahin, annin hmala chhunzawm se an ti a, tul an ti a nih chuan a hmunah kalchilhin thil awmdan an zirchiang ang a, chumi hnuah an report te leh rawtna an neih te chu PAC ah an thehlut leh dawn a ni.
    Mara District Congress Committee (MDCC) hruaitute leh Congress MDC-te hian kar kalta, May ni 31 khan show cause notice an dawn chhanna chu MPCC-ah an thehlut tawh a. An insawifiahna-ah chuan, North East Democratic Alliance (NEDA) ah BJP leh MNF chu inzawm sa an nih avangin, anni in sawrkarna siam mai sela Congress party chu lang lo tur an nih thu te an tarlang a, an kal zelna turte leh an mite opposition a awm rei tawh te an thlirin, ruling a thut ve an duh thute show cause notice chhannaah chuan an tarlang. 
    Congress party PAC duh dan kalha an chet nachhan tarlangin, pawi an tih thu an tarlang bawk a. Heng bakah hian inthlan that leh chu an tlin lova an hriat thute pawh an tarlang a ni.
    Tarlan tawh thin angin, MPCC thuneitu sang PAC chuan, MADC huam chhunga district congress hotute leh congress MDC 4 te chu, congress party PAC duh dan kalha MNF nena sawrkar siam tura thutlukna an siam chungchangah insawifiah tura hriattir an rel a. Show cause notice pe tura MPCC Disciplinary Action Committee an hriattir angin, Siaha district congress hotute leh congress MDC te chu show cause notice pek an ni.