Aizawl August 30, 2023 : Vawiin hian MPCC chuan mithar lawmluhna inkhawm Lal Thanhawla Auditorium, Congress Bhawan-ah an nei a. He huna thusawitu MPCC President Lalsawta chuan an mi lawmluh te chu Mizoram tana Sawrkar tha siam duh, hnam leh sakhaw humhim tura an lawmluhte chu Congress Party tan chauh ni lo, ram leh mipui tana ding tura rawn lut an ni, a ti. An sawrkar chuan mipuite beisei angin Mizoram an her danglam dawn niin a sawi bawk.

Lalsawta chuan, "Ral khata thlirtu mai ni lova, huaisen taka ram tana inhlan ral tura lo kal an ni a. Keini pawhin ram tana nghet taka dinga inhlan turin kan beisei a ni. Sawrkar leh mipui hi kalphung pangngai ringawtin kan kal thei tawh lo; thil tam tak tihdanglam a ngai a. Pathian leh mipuite zarah kan Sawrkar a nih chuan Mizoram hi mipuite beisei leh nghahhlelh angin kan her danglam dawn a ni," a ti.

Congress President chuan, "Ram kan nei, mipui kan nei. Kan mipuite an tha, hruai dik chuan a an tha mai a ni. Ram hruaitute hian he rama dinhmun diktak a awm theih nan mawh kan phur a ni" tiin a sawi bawk a. "Khawngaihna ngai pawimawh hnam kan ni. Hun khirh kan tawhin 'ti rawh u' tih ngai kan awm lo, mangang kan awm em tiin hripui len lai pawhin kan che sang sang a nih kha. He hnam hi kan tun nun zel a ngai" tiin a sawi bawk.

Lalsawta chuan mi pamham te chungchang sawiin, "Rukru chuan a rawk tur a ngaihtuah thin a, Keini hian min rawktu tur MLA kan thlang chhuak dawn em ni? a ti a. Mi dik leh rinawm, kan ram siamthat duh tak tak thlang chhuak turin Mizoram mipuite ka sawm a che u," a ti.

Congress president chuan, "Mizoram mipui nuai 12,34,000 enkawl hi thil harsa a ni lo a. Ram hruaitute hian ramin kan dinhmun dik tak kan neih theihna turin a mawh kan phur. Sawrkar atanga thla khat chhungin hmasawnna tam tak kum 5 chhung daih tur a thawh lawk theih a, thla khat chhung vêk hian kum 5 chhung pawha siam that theih loh pawi a sawi theih bawk. Congress Party kan Sawrkar a nih chuan tumah hleih nei lo, hlauh leh huat bik nei lovin Sawrkar kan kalpui dawn," a ti bawk. 

Congress hian PC Lalhmingthanga, Armed Veng South, Secretary MNF Gen. Hqrs & Ex Mayor AMC ; R. Lalbiakthanga, Chawnpui, Ex AMC ; R. Vanramchhuanga, Ramhlun Vengthar, MBSE Academic Director(Rtd) & Vice President BJP ; P. Sanghmingthanga, Chanmari, Indian Oil Corporation-a Stockist hna chelh tawh leh PS Engineering Works neitu & Secretary BJP ; Reuben Lalmalsawma, Upper Republic, MNF Thalai Headquarters-a Joint Secretary, Aizawl South- I MNYF Secretary & MNF Unit Vice President leh Vanlalchhanhima, BJP, Durtlang Veng te chu an lawm lut a ni.