Congress party-a inrawn khawmna lian, ni thum chhung awh tur, 85th Plenary Session chu Zirtawpni khan tan a ni.

Inrinni khan President Mallikarjun Kharge leh Congress chief hlui, Sonia Gandhi chuan Raipur, Chhattisgarh-ah hian thu an sawi nghal a. Session-ah hian politics, economic leh international affairs lamah te thutlukna lian tak tak an siam ang.

Congress president hian lehkhabu a tlangzarh bakah party general secretary-ten report an pe bawk ang.

Zirtawpnia a tan niah hian Congress Steering Committee chuan an party rorelna sang ber, Congress Working Committee inthlan tur leh tur loh ngaihtuahin, inthlan loh turin an ti a. Party chief-in member turte thlang mai se an ti.

Steering Committee-ah hian Gandhi chhungkua tumah an tel lo va, hei hi party hruaituten an awm ve laia an hmaizahna avanga an duh ang thutlukna an siam theih loh an hlauh vang niin an sawi.

Tun tum session hi Rahul Gandhi-a’n Bharat Jodo Yatra hlawhtling tak a neih hnu lawka huaihawt a ni a, palai 15,000 vel an tel a. An thu ngaihtuah tur langsar zingah nakum Lo Sabha inthlanpui lo awm tura an chet lak dan tur te, eptu party hrang hrangte tanrualna tura an hmalak dan turte pawh a tel a ni.