Aizawl January 27, 2023: MPCC Friday Political Session chu vawiin khan Golden Hall Congress Bhavan-ah neih a ni a, he hunah hian Mizoram University-a Psychology Head of Department, Prof. Zoengpari chuan 'Rilru hrisel tak nena ram kaihhruai leh hmalak dan turte' tih thupui hmangin zirtirna a pe a ni.

Prof. Zoengpari chuan, mihring nun hona hrim hrim piah lamah Politics khawvelah pawh rilru hrisel neih pawimawh zia a sawi a. Rilru hrisel  chuan, midangte nena inlaichinna leh inkungkaihna tha leh thuk tak a nei thin a, rilru hrisel lo chuan midangte nen inlaichinna tha an nei tak tak thei lo tih sawiin, "Rilru hrisel nei turin mahni nihna inpawm thiamna (self acceptance) atangin tan a ngai a. Mahni nihna inpawm thiam  chuan a bula awmte pawh an nihna angin a pawm thiam a, a bula awmte, a thawhpuite pawh phurna tam tak a pe thin," a ti. 

"Mahni hnam leh ram zahawmna hum him leh chawisan kawngah rilru hrisel put a pawimawh a, chutiang rilru pu lo tan ram hruaitu tha nih a harsa," tiin Congress Party hruaitute chu ram hruaina kawnga rilru hrisel tak nei turin a fuih a ni.

Congress Party hian insiamthat tuma hma a lakna kawngah headquarter hruaitute rilru put hmang siamthat an ngai pawimawh a. Revival Speaker-te, rawngbawltu te leh mithiam rualte zirtirna pe turin an lo sawm tawh thin a ni.