Aizawl October 20, 2022 : October ni 19, 2022-a Ramhlun Indoor Stadium-a Aizawl North II Block MNF-ten Block Conference an neihna a Khuallian CM Zoramthanga chuan, "Pathian leh kan ram tan tia mi sang tam tak thisena baptist tawh MNF Party hi kan kalsan thiang lo," tih a sawi. Congress party chuan hei hi Politics-a amah insawh ngheh tumna leh hausak belhchhah zel a tumnaah an ngaih thu an sawi.

Congress chuan, "MNF Movement-ah khan mi tam takin an nunna hlu tak an chan a, nunna chantu Mizo tam tak phei chu MNF kut ngei tuara boral an ni. Heng avang hian chhungkaw tam tak baihvai takin an awm phah a ni. Kan ram leh hnam tana nunna hlantute kha Congress Party chuan a ngaihluin a zah a, an kalsan tak an chhungte pawh Congress Sorkar hunlai khan tuam hlawm an ni. Pu Zoramthanga kaihhruai MNF Sorkar-ah hian ram leh hnam tana nunna hlantu te leh an chhungte hian ngaihsak an hlawh lo hle a, hetiang a nih lai a Politics-a a in sawhnghehna tur leh a hausak zelna tura kan ram leh hnam tana Martar-te hmang fo tawh lo turin MNF President Pu Zoramthanga hi kan chah a ni," an ti.

"CM Pu Zoramthanga hian Pathian leh kan ram tan tih tawngkam hi la sawi ve thin mahse he thu thlung hi Pu Zoramthanga leh MNF Party hian a kalsan tawh, tih hi Congress Party ngaihdan a ni a. MNF ten sorkarna an chan hmasak zawka an kal dan leh tuna kum li dawn sorkarna an chan hnua an kal dan han en hian “Pathian leh kan ram tan” tih thu hi Pu Zoramthanga sawi ve tur chi-ah Congress Party chuan kan ngai lo a ni," an ti bawk.

Congress chuan, "MNF sorkarah chuan ram tana tuartute, Martarte leh an chhungte aiin Kamrula te leh MNF tana tangkaina nei miah loten ngaihpawimawh an hlawh zawk a. Hetiang a ni chung hian Mizoram tana Martar Family zingah te, kan ramin zalenna a neih theihna tura tha lo thawh tawhtu te, lungawilo chung chunga MNF Party-a la awm lui hram hram mi engemaw zat an awm a. Chung mite chu thangharha 'Pathian leh kan ram tan' tih thuthlung kalsantu MNF chhuahsana kan ram leh hnam, mi retheite tana ding thin Congress Party-a rawn lut turin kan sawm a ni," an ti.