- Zochhuanmawia, Bungkawn Vengthar Ni tin chhuak chanchinbu pakhatah July 25, 2013-a Pu Vanneihtluanga’n, ‘Congress Sawrkar bawk aw ni ang’ tih thupui a ziahah khan Mizorama Sorkarna siam thei awm chhun pahnih Congress leh MNF te chung chang a rawn ziak a. Kha a thuziah kan chhiar atanga thla linaah MLA kan inthlang dawn a; Congress Sorkar kalphung kha a duhthu a sam lo tih leh a bik takin Chief Minister phei chuan sikul kum leh chhul chhuah kum, kum pahnih inang lo a nei tih bakah Mosia dan sawm bawhchhiat ching tak a nih thu a rawn ziak tel a. Mizoram kaihruai zel tur chuan a iai tih a lang a, anmahni thlak theitu tur MNF party lah chu Party chhung buai avanga tling zo chuang lo tur niin a hmu bawk si niin a lang. University kan kal ve laiin Political Party-te Election Manifesto kha kan thiante Exam question-ah a rawn kal tawh a. Politic luhchilh ve lem lo mah ila kan ram dinhmun en hian politic hi a ngaihtuah loh theih loh a, Pu Vanneihtluanga thu ziah kha ka dahtha a, a hnu thla lina velah Election result an puang ta a, a thlirna tarmit kha fim bawk a ni ang, Congress bawk chu an sawrkar leh ta a ni. MNF hi Pu Laldenga dam lai chuan an inrelbawlna a tha a, party-a nihna leh Inthlana Candidate tur thlan thu-ah pawh hruaitute bei vak vak ngam an awm lem lo a, an dinna leh innghahnaah an chiang em em bawk. Pu Zoramthanga’n a lo hruai tak hnu hian an del dul ta hle mai a, an sorkar lai pawhin duh duhin an nawrh khum a, a bula awm hnai apiang thu a la ta a, dinna leh innghahna bul bal nei ta lo-in amah siamtu Pu Denga ho-a an Ministry-te hial kha, ‘Kan va lo mawl e aw’ a ti thin an ti. Tunah chuan an innghahna pawh, ‘chu chu a ni e’ han tih tur kan hre ta lo. Mau nge, Chakai farm nge, Saptheite kha nge? Chakma hnawhchhuah nge? Zu do nge? kan hre thei ta lo. Eiruk hi chu vawi khatmah Pu Zoramthanga hian a la do lo a, a sawi pawh Zoram mipui hian kan la hre awm lo e. Congress-ho hi an en ila, an President Pu Lal Thanhawla hi India mai bakah khawvel ram dang zingah pawh politician hlawhtling ber zing a mi a ni awm e. A Chief Minister nih hun chhung ringawt pawh hi belhkhawmin thangkhat lian chuang lai a ni ta! Rorel a thiam vang nge? A dik vang nge? Mi bum a thiam riau vang? tih hi ngaihtuah tham a tling. Tawngkam a thlahdah tih thu hi kan hre zing viau mai. Ram leh hnam tana an thil tih ropui sawi tur erawh a vang phian a, Pu Zoramthanga a tluk lohna pawh niin a lang. Pu Hawla hian party chhung buaina lian tak tak a tawk ve fo mai. Term hnih an Opposition phei kha chuan an Vice President ho khan lian takin an phel phawk kha a ni a. Ding chhuak leh tawh lo tura mawiin an tlu chhe ve a ni. Eng tin tin emaw amah beitute kha a lamah a hipkhawm leh thei a. Sorkar ngelnghet tak a rawn siam leh thei hi lawmpui-awm tak chu a ni phawt mai. Amah anga Party lian emaw Party te-ah emaw pawh President ni rei kan la nei lo a; a kal dan ka ena mak ka tih deuh deuhte: - Publicity-ah an chak em em reng a, anmahni beitute an beih let dante hi Kristian tih atana mawi lo thleng thleng ni mah se hetianga a mi leh sate a hmang thei hi a mak a ni. - Amah sawiseltute a haw ngawt lo niin alang. NLUP hmasa sawiselna bu meuh siamtu chu a la lut a, MP (RS) ah hial a dah thei. MP (LS) pawh hi amah uiresantute zing a mi bawk. Media Department-a Chairman pawh hi MNF a awm laia amah bei nasa tu ber leh amah pawhin, ‘vai dawr vela pawisa khawn thin’ a tih kha a ni. - Party inrelbawlna fawng vuantu-ah khawi lai lai emaw vai dawr vela tukluih chhiah khawn thin zirlai hruaitute a dah ve mai mai ngai lo a. Party-a mi ngel nghet leh tlo te a dah fo hi a dinkhawchhuahna bul a ang. NSUI leh MPYCC President ni tawhte hi han en ila, chutiang/khatiang an ni tur a ni tih a ngaihtuah vak lo a, Party-ah leh khawsak phungah a ngel nghet em? An chhungkua eng ang mi nge tih a thlir niin a lang. A tih fuh berte zing a mi a ni ang! - Zirlai hruaitute zingah pawh amah beltute an awm a, a ti lawm thiam tho. An hna a siam sak a, Party chhungril / Party kaw-chhung haipha si lo leh hmu pha lo tawkin a dahthiam a. Anihna takah chuan a Party chhan tur leh midang bei turin a dah tihna a ni. Minister ropui tak veng tura Police arsi bel kai lo an awm ang deuh hian. - Party inrelbawlnaa a thu chu a tlang viau ang tih a rin theih laiin Agenda tur chu an Gen. Secy ten an buaipui a, a hman hun tur an zawt a, an committee thin an ti. Chutah chuan Agenda a sawi vak ngai lo a, thu a khaikhawm mai thin an ti bawk. - A duh hunah a rum leh viau lawi a, An Party Candidate beite chu eng hun pawh nise a hrem hmak hmak mai a, ‘bial ngaia ding ngam lo chu ding lo mai rawh se’ te kha inthlan dawnah a ti hmiah mai a. MLA-a din tum ve, din tak loh avanga Candidate te bei phei chu Action a la hmak hmak a, hei hi a Survive-na chhan lian berte zing a mi a ni awm e. Congress-ah anmahni Party mi leh saten an Candidate an bei ve ngai lo. - Thusawi a thiam lo, NLUP pawh a fak mawi thiam lo. NLUP thatna leh kalpui dan tur darkar hnih sawina hun pe ta se a sawi buai viau awm mange tih a nih laiin NLUP bak Congress hian innghahna a nei lo a, a sawi ngai bawk lo. Pu Hawla = NLUP tih hi mipui hriat dan a ni. MNF President thung chu chutiang a ni lo. A awm dana mak ka tih deuh deuhte:- - A thil tih dik loh emaw amah sawiseltute chu a do ngar ngar a, a lamah hruai a la nei lo. - Publicity-ah a chak lo. A Sorkar laia a hnathawhte hi sawisen mai chi pawh a ni lo: Kawng, Building etc-ah hna ropui tak tak a thawk a, Zoram mipuiin kan hre lo. Mi hman tlak a zawng ngai lo a, amah hnaih apiang leh tlawn peih apiang nihna a pe thin a, chuvang chu a ni thei. - Party-a mi nghel nghet ngaih pawimawhna a nei lo a, mi thar a lawm em em. Zirlai hruaitute phei chu a ngaisang em em a. Party inrelbawlna chhungril ber berah a dah nghal pawp pawp thin a nih hi! Hei hi pawn lam atanga supporter-ten amah an iai-na ber niin alang. Kan vengah pawh hian MNF Party retheih lai ber pawha nghet tlatte aiin a rawn lut thar. Hmanni lawka mi in luaha lehkha rawn zir. An sum hmuhna kan hriat mang lohte leh vai an vaw thin kan tihte kha a siam lian chak a, a ngai pawimawh zawk bawk. Veng dang an ni ve em ka hre lo a, kan vengah chuan MNF ruhkawl ho hi rilru na takin an awm a, an hliam a la dam lo. An President hian tihdam tumna pawh a nei lo niin alang. - Zirlaiten lo haw lo se, kan Zirlai inthlan dan hi tenawm tak a ni. Private-a ka thawh laiin kan experience ve a. Vote lei hi Zirlai atangin an lo practice tawh a lawm mawle!! Khawi khua emaw, Branch emaw atanga lo kal turte kal man, ei man leh senso dangte chu Candidate ten an tum sak vek a. Vote an inlei dante lah a fair phian, an leisakte vote neih zawng kha pawisa an inpek rualin an inthleng nghal tawp a. Nihna nei lem lo kan thawhna sikul naupangte kha an luhtir a, an vote tur kha chiang takin an hrilh a ni. Chutiang chu MNF-ah hian a la lut a, a mihring bakah an inthlan dan tenawm tak pawh a seng lut tel a. Executive pawh hruaitute ruat fel vek hnu-ah an inthlang dawn a ni awm e. Hetianga in hmang ve lo MNF mi nghet te chu Hnam Runah chuan mikhual an ni zo ta a, Zirlai hruaitu hluite chuan lalna leh thuneihna leh bial chu an in chuh ta a ni ber. - A tawngkam a thlum a, Khawvel mi thiamten an ziahah tawngkam thlum tih hi Quality of Good Leader-a ka la hmuh loh Pu Rama Quality neih a ni. A chetsualna pawh niin a lang. A party a enkawl zo lo a, a naute bial leh nihna inchuhin an in sual buai a. Bial chang lo apiangin a dingte an bei a. Thununna lek chu sawi loh pawn lam atanga lang khawpa anmahni MNF Candidate beitute pawh a duhsak tawh chuan a duhsak chhunzawm zel a. A lam hnaite, a ina lengkai tam deuhte chu eng ang mi pawh nise MNF-a a OB-puite ai pawhin a ring zawk ni berin a lang. Hmanni lawk khan Nitin chanchinbu, The Aizawl Post-ah Pu Hawla hian tuna MNF Thalai President hi, MNF Candidate tih chhiat nan Rs. 2,00,000/- a pek thu ni 18/4/15 chhuakah khan kan hmu a. Engtin tak ti ang maw kan tih laiin a hnu lawkah MNF Party aiawhin Zirlai hruaitu pakhat nen TV ah kan lo hmu leh a, hetiangah tak hian MNF a Original leh mi nghette rilru a hliam nasa hle niin kan veng pa pakhat, MNF-a a nihna atanga chawl ta vang vang chuan min hrilh. - Hriat loh a nei. Zu chungchangah hian a naute, tuna a hman tangkai em emte pawh hi zu avanga Jail tang tawhte pawh an awm. Mipui bum tumin Zu duh lo ber angin a insawi a, a naute zinga a duhsakte hi zu bawiha tang mekte, zu permit awm hma phei kha chuan Excise Officer-te hnena zu dil hrat ve tak takte an ni tih a hriat loh avangin mi tam takin zu chung chang a sawiin an nuihzat. Heng lo pawh hi kan la sawi zel ang. Amah, Pu Vanneihtluanga dungthulin Congress sorkar hi duhkhawp lo viau mah ila, tun atanga kum thumnaah MLA kan thlang leh dawn a, tun anga MNF hi an kal zel a nih chuan Congress bawk an sorkar leh mai awm mang e ka ti deuh.