Aizawl: Mizo National Front Media & Publicity department chuan MNF in hma a sawn mek laiin Congress party leh ZPM party bansan an intih hmuh nasa hle niin an sawi.

Nimin khan Aizawl Press Club-ah chanchinbumite kawmin MNF Media & Publicity Department General Secretary VL Kroshnehzova chuan, "Inthlan hmachhawn turin kan thiam leh theih ang angin kan inbuatsaih mek a. Hetiang a nih lai hian MNF Party chuan hmasawnna duhawm tak a nei mek zel a. ZPM, Congress bakah party tenau dang leh neutral atangin nitin mithar duhawm tak tak kan neih belh zel a. Kalphung nawi movement leh That loh theih lohna bawma leng lote chu MNF ah lo tel turin kan sawm a ni," a ti.

MNF party chuan nasa takin hma a sawn tih sawiin, "Ni 25.5.2023 atanga 7.7.2023 inkar chhung ringawt khan Zoram hmun hrang hrangah Congress, ZPM, BJP leh neutral atangin voter 10757 kan lawmlut a. Lawmluhte hi fimkhur tak leh dik thei ang ber tura Hnam Run Publicity Department-in kan chhinchhiah an ni a. Heti taka MNF party-in bawh a hlawh hi MNF sawrkar-ah mipuiin rinna an nghat tih a lang chiang a. MNF President leh Chief Minister ni bawk Zoramthanga chungah mipuiin rinna an nghah zia a lang chiang hle a ni," a ti bawk. 

Congress chungchang sawiin an Treasurer leh PAC member te an bang tih sawiin, "An President in Congress ni turin duh bik leh thlan bik a nei a, an President duh bik leh thlan bik ni lo tan Congress-ah hmun a awm meuh lo. Tuna Congress hruaitu lian tak tak Congress Party-a la awm hram hramte pawh hi MLA ticket chang lo tur chiang sa te an ni hlawm a. Nakuma an inthlan huna an President paih theih a nih beiseia a der maia la Congress hram hramte an ni," a ti a.  ZPM pawh an buai tih sawi bawkin, "An hotute-ah inrem lohna leh ngaihdan inan lohna a nasa em em a. An hotuten duhsak hrang theuh an neih avangin an duhsak zawng theuh haivur nan an party dan pui (constitution) meuh pawh an mahni ngeiin an bawhchhe duh a. Mahni party chhung pawh rel fel thei lo, mahni dan siam ngei pawh mahni ngeiin bawhchhe duh hian rorelna fel an kalpui lovang tih a chiang hle a. An nihna kalsan chuang lova hming thar invuah, beram vun sin a fing taka chinghne khawsa ang vel an ni," a ti a. ZPM chu darh huk thei dinhmunah a ding mek niin a sawi bawk.