Vawin khan Congress Party atangin Ex-Minister Pu KS Thanga'n MPCC President Pu Lalsawta hnenah a thehlut a. Congress sawkar laia Parliamentary Secretary hlui KS Thanga hian a ban chhan hi point pasarih (7) a ziak lang a. MPCC President Pu Lalsawta chu Minister a nih laiin, Luangmuala Pu KS Thanga chenna inah sorkar motor-in, driver leh PSo hruaiin amah ngeiin cheng nuai 25 a hawn tih a ziak tel.

Hei bakah hian MPCC President Pu Lal Thanhawla banna tura nasa taka hmalaah Pu Lalsawta chu a puh a. Signature campaign-te huaihawtin Pu Lalsawta hian MPCC President a nih theih nan Pu Hawla hi nasa taka a beih hnuah a 'term' zawh hmain Congress hmangaih vangin a bang ta niin a tarlang bawk.

KS Thanga rual MPCC Secretary pahnih; R. Vanlalruata & Seventha Chawngthu,  MPCC State Organiser pahnih; C. Lalhmunliana leh ZD Lalfinga leh Congress Thalai E/M leh Block President pakhatin banna an thehlut bawk.

KS Thanga hian Pu Lalsawta hi Congress Dan (Constitution) palzamin, mahni duh dana dan kalha rorel a nih thute a ziak tel nghe nghe a ni. ADCC a thiat a, PAC thiat lehin amah thuneihna inpe chawpin Nomination Committee member a ruat tih a ziak bawk.

A hnuaiah hian a banna thehluh chhan kimchang zawka tarlan a ni -

 

To, Dated Aizawl the 9th June, 2023

 

The President,

Mizoram Pradesh Congress Committee (MPCC)

 

Subject : MPCC atanga banna.

 

Ka pu,

 

Mizoram Pradesh Congress Committee (MPCC)-ah hian hun rei tak chhung, kum 30 dawn lai, Pu Lal Thanhawla President kaihhruaina hnuaiah kan lo awmho tawh a. Pathian kaihruaina, party thawktute leh Mizoram mipui zarah Mizoram tan hnathawk theiin, dinhmun pawimawh tak takte hi ka lo chelh ve tawh a.

 

 

Kan President zahawm tak Pu Lal Thanhawla kaihhruainaa hun rei tak kan awm hnuin, nangin President nihna chelha min kaihhruaina hnuaiah pawh rinawm takin ka awm zui zel a. Amaherawhchu, tunlaia thil awm dan thlirin; huikhawm lam aiin inthendarhna lam kawng kan zawh tak zel avang leh Congress party President ni tura bul i tan dan hrim hrim han chhut hian hian ram rorel tak tak tur atan Pathian malsawmna dawng tlak i ni hian ka hre thei lo a. Chuvangin, a hnuaia a chhan hrang hrangte avang hian MPCC-a ka nihnate bansanin party ka chhuahsan a ni tih ka hriattir a che.

 

1. Pu Lal Thanhawla paihthlakna:

 

Kum 10 lai duhsak taka ‘Cabinet Minister-a’ dahtu che leh i dinhmun zahawm zawng zawng petu che midangte la tih ngai miah lohin party President Pu Lal Thanhawla paihthlak tumin hma i la ngar ngar a. Aizawl hmun hrang hrangah vawi tam ‘meeting’ i hova neih thin a ni a, ka in ngeiah pawh mi in rawn dil angin zanriah te ka lo buatsaih a, ‘meeting’ pawh neih a nih kha. 

 

Khati anga inkohkhawmna i ho thinah khan Pu Hawla paihthlak tumin ruahmanna chi hrang hrang i siam a. Pu Hawla’n a hun takah ka kian ang a, ka ‘term’ dinglai hmang zo ila, a tih laiin kum 2021 kum tawp lamah Aijal Club-ah Congress hotu lian tak tak pahnih zanriah i huaihawttir a, chu chu nangma remtihna thlapa hmalak a ni tih a kalte hnenah hriattir an ni bawk. Hemi tum hian Pu Hawla paihthlakna tura ‘signature campaign’ hmalak rel a ni a. A kalho zinga mi 50 laiin ‘signature’ an pe a nih kha.

 

Chuta kalkhawmte chu Aizawlah an vakdarh leh ta a, veng hrang hrangah hma an la a, hming za hnih za thum an lakhawm a. Chumi chu naupang zawkte Pu Hawla hnenah tirin, ‘signature’ an la tawh a, i bang duh lo a nih chuan a aia tam thingtlangah kan vak chhuak ang, i tihtir a. Pu Lal Thanhawla’n mawihnai taka chawlh a tum laiin, nghak zo lovin Delhi lamah thlena ban turin hma in lak tur thuin i vau ta hial bawk. Pu Hawla hi mi puitling tak a ni a, bang tura i hmalakna hi  lo bei let tur chea chakna leh theihna nei a nih laiin Congress hmangaihna avangin lo beilet lo che in, Congress chhungkua a buai zel loh nan zahawm takin a chawl ta zawk a. Hei hi Mizoram Congress history-a awm reng tur atan chuan a pawi hle.

 

Heta thil pawi tak i tih zui chu, Pu Hawla tantu leh lainattu mi tam tak Headquarters-ah an awm ve a, chu chu nangma hmelma anga ena Congress atanga um chhuah vek i tum hi ‘politics’ tha lo tak leh pawi tak, nangma tan pawha pawi a ni. Tunah hian hei vang hian engemaw zat chu Congress atangin an chhuak tawh a, tunah pawh an la chhuak zel dawn a ni.

 

Tunah hian Congress chhungah ‘power’ hmanga i nek beh a za tel teh meuh an la awm a, hun tha nghakin an la intelkhawm ve tlat a ni, chungho chu an rawn chet let niah chuan i lu chunga meiling i chhek a ni tih i la hmu ngei ang. 

 

Thil pawi leh awm chu Pu Hawla paihthlak nana a tawp thlenga i tihpui leh hmalakna sum seng ber kan party ‘senior’ tihmualpho tuma i hnawl leh si hi rilru tha tan chuan tihchi a ni lo. Rilru na taka i siam avang hian amah ngei pawhin i President-na tura Pu Hawla na taka beitua a lo tel a inchhiarzia lantir nan Pu Hawla hnenah a thiante hruaiin ngaihdam pawh a dil phah hial a ni. Heti khawpa i lamtang i hnawl mek lai hian Pu Hawla chuan puitling takin a lo ngaidam leh thlap thei a, in mizia leh kalphung a inpuitlin hleihzia a lang chiang hle.

 

2. Cheng nuai 25 pek let i sawi kha:

 

Tun hnaia cheng nuai 25 i lo tihrik kha, (an hming sawi a tul tawh lo a) mi zahawmtak chhungkua an ni a, an rilru pawh a na em em a ni. 

 

He thilah hian i thianghlimna lantir i tum hi chu thudang a ni a, midang tihbawlhhlawh i tumna hi chu a puitlin loh thlak hle a ni. Kan sorkar laia thil thleng daih tawh a ni a, i in sak lai a ni a, sum i mamawh lai a ni. Mi thilphal leh mi tam tak lo pui thin thian leh chhungkua anga ka neih an awm a, chumite hnenah chuan i harsatna hi ka lo sawi sak ve dawn che em ni ka ti a, i remtihna thlapin ka sawi sak che a ni. Pawisa pawh hi ka hnenah an rawn dah a, Luangmual ka in atangin Sorkar motor-in i PSO leh Driver rawn hruaiin nangmah ngeiin i rawn la thlap a, i hawn ta a ni. I inah pawisa kha i hriat lohin tumahin an lo dah lo. A hnuah ngaihthat lohna i nei ta nge, hlauh i nei ta nge kei chuan ka hre lo va, i pe kir leh niin i sawi a. Nangmah hi an hmelhriat lo che a, chuvang chuan ka hnenah an rawn dah a, i lo mamawh leh lo a nih chuan a lawmawm e. 

 

Mi tha tak leh thilphal tak hnenah i harsatna ka thlen sak che a, i mamawh lo a nih pawhin midang hmai tihbalh talh i tum hian i mize puitlin lohzia a tilang chiang hle a ni.

 

Kei hi helaiah hian thal tel tur ka awm miah lo a. Hei hi i sim ka duh hle mai. Thildang tamtak sawi belh tur a awm tam viau mai. I mualpho theihna tur chu kan hailan zel loh nan fimkhur la ka duh a. I thianghlimzia tarlan nana thiante thianghlim lo anga i tarlan duhna hi i mualpho zau loh nan sim daih rawh. 

 

I Education Minister nih laia i bial chhunga Congress hruaitu pakhat (a hming tarlang lo ila) chu SSA hnuaia; school uniform, lehkhabu leh damdawi ‘supply’ thlengin hausak tawntawna tham sumin i vur tih hi i bial hlui ten an hre khawp mai. Aizawl mi hausa  tia hriat khawpin i haivur nia sawi a ni a, tuna i tlangaupui ‘That Loh Theih Lohna Bawm-ah’ hian hengte hi a leng vek tho em ni? I sawi ang hian i kal em tihte pawh lo inzawt thar ve leh ta la a tha ngawt ang. 

 

 

3. Mahni thianghlim anga inchhuah tumna:

 

Party dangin Congress sorkar kal tawh min bei a, chhe lailet der leh anchhen dawng angin min chhuah a. Beihlet i duh hauh lo a, nangmah chauh mi tha anga intarlan i tum avangin i thawhpui Ex-Minister-te thlavang hauh i phal miah lo a, hei hi nangmah chauh lan mawi i tumna, bawlhhlawh leh zahpuiawm tak a ni. Party chhungah pawh hei hian a ruka sawi leh khel a hlawh nasa reng a ni. Thianghlim lo leh bawlhhlawh nia i ngaihte kiangah lungsi takin kum 10 zet kha i awm a, cabinet minister leh minister i nihpui te kha tun hnuah an bawlhhlawh thar ta thut em ni?

 

Tuna i tum ber chu Congress hruaitu hlun leh Mizorama ‘term’ nga Chief Minister lo ni tawh Pu Hawla kaihhruai tawh sorkar leh kalphung chu chhe lailet dera tlangthantir a, nangma hoa Congress thar leh thianghlim din tum anga inlantir hi a pawi a. Chuvangin, Congress sokar thil tihthat sawitu apiang i hote nena hmelma anga in en vang hian hmasawnna kawng hi in zawh theih ka ring lo a ni.

 

4. PAC rahbehna:

 

Political Affairs Committee (PAC) te hi Congress Party-ah chuan thuneitu sang a ni a, chumi pawh zahna nei miah lovin hun rei tak ‘meeting’ pawh i ko duh lo a. Pu Lal Thanhawla lo din PAC-ah ngei hian nangmah pawh i tel a, mahse i rapbet zui ta a ni. Tunah phei chuan i thiat ta nghe nghe a. Nangmah leh PAC member-te pawh hi Pu Hawla min ruat vek  kan ni a, Pu Hawla hi India rama Congress thuneitu sang ber Congress Working Committee (CWC) Member a ni a, a tira PAC-a ‘meeting’ i koh thin lai pawhin Congress Bhavan-ah awm ve reng mah se, tel ve turin i sawm ngai lo. Hei hi thil zahthlak tak a ni a, CWC member hi State President lakah chuan sang tak a ni.

 

5. Congress Mizo ‘culture’ vawngnungtu:

 

Congress party hian Mizo Union, Mizorama ‘political party’ ding hmasa, Mizo pa ropui leh mi fing hmasa ten Mizo hnamzia (culture) mila pawl an lo kaihhruaina, Mizo tlawmngaihna, aia upate zahna, thawhpuite nen inzahtawn thiamna, chung zawng zawng chu Congress Party nena inchhunfin (merger)-ah khan a rawn luhpui vek a. Chuti anga hruaitu hmasa leh ropui ten an lo kalphung chu; Pu Lal Thanhawla hian a chhawmnung zel a. Chuvangin, Mizoram Congress Party hi puitling bik anga hmuh an ni thin.

 

Tunah chuan i kaihhruaina hnuaiah aia upa leh ‘senior’ zawkte zahna a awm tawh lo a, i naute ‘politics’-a tawnhriat la nei lo, kum lama naupang te te thlengin thupui hlapui vaituah i hmang ta daih a. Mizo ‘culture’ leh Congress ‘culture’ nasa takin mausam a ni a, hun rei tak zahawm taka kan lo kalpui tawh chu i tichhe ta a ni.

 

6. NLUP duh lotu-in nuai 2 sem i tiam leh:

 

Congress Party hi Pu Lal Thanhawla lo kaihhruai tawhna kalh zawngin i kalpui ngat ngat a. NLUP sem duh loh thute sawi chhuak hmasatu i ni nghal a. Tunah i nauten ‘campaign’ a harsa an tih avangin Tang Puihna cheng nuai 2 i tiam leh ta mai si a. Hei hian ‘principle’ mumal tak neia party i kaihhruai lohzia chiang takin a tilang.

 

NLUP kan kalpui hun laiin chhungkaw 1,90,000 (nuai khat leh sing kua) hnenah tanpuina kan pe hman a, cheng vaibelchhe 2,571 kan seng a ni. NLUP kan sem ang tia kan tlangau lai khan khatih hunlaia India ram sorkarna chelhtu UPA chairperson Pi Sonia Gandhi te’n sum kan dawn tur thu a hring a hranin kan tualzawlah ngei an rawn puang a nih kha. 

NLUP-ah nuai khat kan tih laiin, tuna Tang Puihna i tihah hian nuai 2 i tiam ta a, cheng vaibelchhe 5,000 mamawh a ni dawn tih a lang chiang ta a. Khawi atangin nge he pawisa hi hmuh i tum le, i sawi chian loh chuan tumahin an ring ngam chuang lo ang che.

 

7. A chhan dang pawimawh:

 

Congress Party Treasurer-in a nihna atanga banna a thehluha a ‘ban chhanah’ khan thawhpuite rawn lova; Nomination Committee (Election Committee) Member i duh duh i lo ruat thar te, Aizawl District Congress Committee (ADCC) thiahte leh Political Affairs Committee (PAC) thiah tumte tarlan tel a ni a.

 

Tunah chuan PAC chu i thiat ta ngei a, Election Committee member i duh thua i lo ruat ringawt thinte pawh kha a pawiin kan Party Dan Bu (Constitution) kalha i chetna a ni tih hi Congress leh Mizoram mipui pawhin an hre vek a ni. Party Constitution kalha che te ban an nih rualin nang chuan i duh lai lai i bawhchhe reng bawk.

 

MPCC Dan Bu (Constitution) Article-VIII number 2-ah chuan ‘Election Committe’ (Nomination Committee) chungchang tarlan a ni a. Member hi i ruat tur ni lovin, MPCC Executive Member-te thlan tur a ni. Ruat theihna erawh MPCC Elected Office Bearers (President, Vice President leh Treasurer) te Executive Member-ten tha zawka an hriat chauhin thuneihna pek an ni. He dan hi bawhchhiain MPCC Elected OB pathum chauh zinga pakhat Treasurer i rawn lote kha party dan i bawhchhiatna nasa tak a ni.

 

Congress ka chhuahsanna hian i rilruah danglamna tlem tal a thlen hlauh a, Congress-a rinawm taka la ding, hmelma anga i ngaih tlat te, President ni chunga ho tlemte  neia lamtang i siam tlat te, Congress hotu rinawm taka la ding hmelma anga i en tlatte hi i sima i insiamthat phah nana i hman chuan Congress tan hlawkna tlem tal i lo hmuhpui pawhin a lamawm hle ang.

 

A chunga ka rawn sawi zawng zawngte hi uluk taka vawi tam ka ngaihtuah hnuin vawiina i ‘politic’ khelh dan leh party i kaihhruai dan hi Pathian malsawm ram rimnam niin ka hre lo a. Chuvang chuan, party-ah kum sawm thum hmel hmua ka lo awm vena hi nang ang mi dik lo kaihhruaina hnuaia awm ai chuan rilru na tak chungin Congress party ka chhuahsan ta a ni tih ka hriattir a che. 

 

 

Sd/-

(K.S. THANGA)

Tuikhuahtlang, Aizawl : Mizoram