Aizawl July 12, 2022 : Mizoram Pradesh Youth Congress Committee (MPYCC) chuan vawiin khan Excise & Narcotics Department Minister hnenah an lehkhathawn an pe a, Wine zawrh an man sak avanga rilru hah avanga thi-a an sawi Lalhriatpuii, Dawrpui Vengthar hnenah zangnadawmna cheng Nuai 100 pe turin an phut.
    
MPYCC chuan Lalhriatpuii (L) Dawrpui Vengthar chu May 27, 2022 khan Excise Department-in an grape wine zawrhlai chu in mansak vek a, tunah pawh engmah pek let a la ni lo. A eizawnna ve ber grape wine a zawrh theih tak si loh avang khan a mangang a, chhungkaw eizawngtu ber a nih angin a rilru a hah em avangin vawiinah a nunna hial a lo chan ta a ni, an ti a, MPYCC chuan, "A runthlak kan tiin a na kan ti hle a ni," an ti. 

Congress Thalai chuan naktuk July ni 13, 2022 chhun dar 12:00 hma ngei hian Mizoram sawrkar-in Lalhriatpuii (L) chhung te hnenah zangnadawmna cheng Nuai 100 pe ngei turin kan phut a, an ti a, "In pe lo a nih chuan a tul angin hma kan la ang tih kan han hriattir a che," tiin Excise minister hi an lehkha pekah hian an tarlang tel bawk a ni..