Aizawl : Social media lama video record a darh avanga Mizoram Police duty te tui tlan chungchang tarlann avanga Hav. Dengthangpuia 'suspend' a nih chungchang leh insawifiah tura koh te thlavang hauhin vawiin khan MPYCC chuan an President Dr. Lalmalsawma Nghaka hovin IGP John Neihlaia, IPS an hmu.

MPYCC (Congress Thalai) chuan President Dr. Lalmalsawma Nghaka hovin John Neihlaia IPS, IGP an hmu a. MPYCC hruaitute hian tun hnaia ramri depa Mizoram Police duty thenkhat ; an tui tlan nu tak 'video record' siama social media lama darh ta avanga 'suspend' tawk ta Hav. Dengthangpuia leh hemi kaihhnawiha May ni 13, 2022 hmaa insawifiah tura mi pathum an koh te thlavang hauhin IGP hi an sawipui.

Tuihawk nu tak 'video viral' ta kha Saipum khua atanga Km 20 vela hlaa Police-te duty-na hmun a ni a. He video social media-a a darh avanga Police thenkhatin harsatna an tawh chungchang Congress Thalaiin IGP John Neihlaia hnena an sawipui hian rahtha a thlen ngei an beisei thu sawiin, John Neihlaia pawh hian hemi chungchangah hian hma a lak tur thu MPYCC te hi a lo hrilh.

Assam leh Mizoram ramri buai a reh theih loh avanga ramri-a duty Police ten thil lian tham lo taka hrem an tawk ta mai hi Congress Thalai chuan vanduaithlak an ti a. Ramria duty Police-te duty-na hmun hi ruahtui pawh tla se motor-a tlawhpawh zung zunga siam tur a nih laiin, sawrkarin a hnuchhawn tlat hi Congress Thalai chuan pawi an tih thu an sawi.

Ramri duty Police-te awmna hmun mumal lo leh tui tlan tur mumal awm lova ram chhan nana Police duty-ten hotute vaukhanna an tawk hi Congress Thalai chuan pawi kan ti Congress chuan an ti. "Kan sawrkar hrawn mek hian ramria duty-te ngaihsak a, tuna 'suspend' tawk tak leh insawifiah tura koh te hi zahngai taka hrethiam a, an hrehawm tawrh mek te thawi dam nan thupek kal mek sut turin Mizoram sawrkar kan phut a ni," an ti bawk.