Aizawl May 22, 2024 : Congress Thalai, MPYCC chuan vawiin khan Home Minister hnenah lehkha an thehlut a, Dan dik lo hmanga ram pawna hnathawk thawnchhuah chungchanga hma la turin an ngen a ni.

India danin naupang kum tling lo hnathawka chhawr a phal loh lai leh passport dik lo (a lem) hmanga hnathawk tur inthawnchhuah chungchanga hma la tur leh thil dik lo titute an phu anga hremna pe a, a tul anga hma la turin MPYCC chuan 28.4.2024 khan Chief Minister Lalduhoma chu a office-ah hmuin ngenna an thlen a. Chief Minister hian an duh anga hma a lak chak tawk loh avangin Home Minister hi Chief Minister aia harsatna chingfel thuai thei zawk tura an ngaih avangin he thilah hian hma la turin an ngen a, Chief Minister hian a nihna hial pawh hi a tul a nih chuan kian ngam tur chein an phut thu an hrilh bawk.

MPYCC chuan, "Tun hnaiah Talmud Employment Agency te chuan kum tling lo ram pawnah hnathawk tura an thawn avangin an chenna Bazaar Veng, Mamit YMA leh naupang nu leh pa te an mangang hle a. Ni 10.5.2024 khan CID Crime Branch-ah FIR pawh thehluh a ni. Harsatna tawk kum tling lo hi Visa Status Local Authority te’n endikin, Visit Visa thlakhat dam tura UAE lut a nih bakah Resident Visa (Sponsor Visa) kum hnih dam an lo chhu (stamp) hman bawk. He thilah hian Chief Minister rintlaka kan ngaih loh avangin Home Minister I nih anga a rang lama chinfel a nih theihna tura hmala tur leh thil dik lo titu Agency-te hi man a, hrem turin kan ngen che a. Harsatna tawk naupangte hnen atanga pawisa fai Rs.30,000/- an laksak pawh a rang lama pelêt nghal tura hma la turin kan phut bawk che a ni," an ti.

Mizoram Police thuchhuah May ni 1, 2024-in a tarlan danin, Syria rama Mizo hmeichhe naupang pathum (3) hnathawk tura thawn harsatna tawkte hruai haw an nih tur thu leh Syria-a Indian Embassy pawh dawr nghal a nih thu tarlan a ni a. Mizoram mipui leh harsatna tawk chhungkua te pawh an lawm hle. Mahse, Syria Indian Embassy lamin Mizoram sawrkar emaw Central Ministry of External Affairs (MOE) atangin official-a biak an la nih loh bakah harsatna tawk naupang pathumte, vawiin ni thlenga biak an la nih loh thu leh Mizoram atangin Agency-te leh CID nia inchhal te’n mumal lo taka an biak bak engmah hmalakna a awm zui lo hi MPYCC chuan mak an ti a, he thilah pawh hian a rang lama mi mangangte harsatna chingfel turin Home minister hi an ngen. Tun chinah chuan sawrkar hian thudik tawk lo Mizoram mipui hrilh tawh lo turin kan phut a. He thilah hian a rang lama hma la tur leh thudik tak leh belhchian tlak chauh mipui hnena sawi turin sorkar an phut bawk a ni.

MPYCC chuan Mizoram sawrkar-in Syria Indian Embassy hi eng kal tlangin nge a biak? tih hi mipui min hrilh tur leh sawrkar hian tlâwmah la lo a, Ministry of External Affairs, New Delhi-a Mizo IFS Senior pahnih awm te kaltlang tal hian Syria Indian Embassy emaw Dubai-a Mizo tlangval Lalchhuanzela (Zela) hmang hian a rang lama hma la thuai turin an ngen a. Mihring hmanga sumdawnna, India dan leh Pathian thu pawhin rem a tih loh, a phal loh titute dodal tur hian Kohhran, Sorkar, Political Party, NGO te tangruala hma la tur leh penchhuak turin an ngenin an sawm bawk a ni.