Mizoramah hian consumer-te dikna leh chanvo rahbehna a nasa hle a. A nihna taka sawi chuan ‘Mizote hian consumer kan nihna anga kan chanvo kan chang pha lo nasa hle’ tiin a sawi theih ang. Dawr tam takah thil kan lei a, a MRP aia toin min leitir a, pawisa nawi min kir tha duh lo va, a chang leh pawisa nawi aiah Vitamin C-te, chewing gum-te min kir mai mai a. Khawl thil (mobile phone thlengin) kan lei a, a lo tha lo va, warranty huamchhungah pawh a thlawnin min siamsak duh lo va, a thara thleng or a pawisaa inkir leh emaw phei chu beisei ngam a ni lo fo. Gas connection fee pangngai aia to fe (District thenkhatah phei chuan a man pangngai let thawk)-in gas connection kan la a, Gas stove Rs. 1500/- mante kha Rs. 3000/4000 ten min leitir a, gas subsidy lah kan bank account-ah a lut mumal thei hek lo. Damdawi inah mangang takin kan awm a, thawktute inthlahdah (service deficiency) vang liau liauin mi thenkhat chuan natna kan tawrh belh a, nunna hial kan chan a. Internet speed sang tak man kan chawi reng a, satel speed niawm tak kan dawng a. Tui leh electric bill a sang thut thut a, hman tam deuh thla nia kan hriatah a tlem leh lawi a. Private School-ah leh Hostel-ah man to takin facilities chhe tak hnuaiah kan fate kan dah a, thenkhatah phei chuan hostel fee Rs. 5000/6000 chawi chungin kan faten tui an chawi pur pur a, mess a la chhe em em zui a. Kan phun kan phun a, dan ang taka hmalakna a awm si loh avangin tute mah hian mipui hlauhna/zahna an nei thei si lo. Sorkar lahin mipuite aiin sumdawngte chu a hlau ta zawk emaw tih tur a ni a. Sumdawngte leh hnathawktute chu intelkhawmin pawl chak tak an din a, chumi hmang chuan sorkar an dodal a, inthurualin mipui min rawk a, an duh hun hunah thil man an tisang a, engemaw hlekah an inthurual leh them bawk si. Greek thufing pakhat, “United we stand, Devided we fall” tih chu a takin mipuite rah beh nan an hmang hlauh a. Mipuite lah chuan khinlet nachang kan hre si lo. Khinglet ang u… Consumer kan nih anga kan chanvo neihte ngaipawimawh hauh lova min rap bettute hi kan khinlet a ngai takzet tawh a ni. Chutiang tur chuan District tinah hian consumer-te thubuai put luhna tur Consumer Disputes Redressal Forum (District Forum/Consumer Court kan tih mai) sorkarin min siamsak a. Aizawl District tih lohah chuan DC-te chu Forum President an ni nghal zel a. District Forum thutlukna a lungawi lo tan appeal-na tur State Commission a awm a, chuta lungawilo tan National Commission thlengin a awm leh zel a ni. Consumer Forum-a kal a thubuai siam hi hautak deuh tur emaw kan ti a; mahse, a ni hauh lo. District forum-ah chuan thubuai, cheng nuai 1 hnuai lam chetvelnaah fee Rs. 100/- chiah chawi a ngai a (BPL leh AAY family tan a la free zui), nuai 1 leh nuai 5 inkar tan Rs. 200/-, cheng nuai 5-10 tan Rs. 400/-, cheng nuai 10-20 tan Rs. 500/- chawi a ngai ve thung. State Commission-ah chuan cheng nuai 20-50 chinah Rs. 2000/-, cheng nuai 50 – 100 chinah Rs. 4000/- chawi a ngai thung. Mi nawlpui buaina, kan thubuai tamzawkah chuan Rs. 100/- lek sengin thubuai kan thehlut thei tihna a nih chu. Tin, Ukil hi rawih ngei ngei tur emaw kan ti thin a; mahse, a case azirin a ngai vek hauh lo, mahni pawha chinfel theih a tam mai. Complaint kan thehlut dawn a nih chuan thil thlen dan leh kan lungawilohna chu chiang taka ziakin, kan thil phut chiang taka ziahlan tur a ni a, zangnadawmna kan phut a nih pawhin kan phut zat/dan chiang taka ziahlan a, document awm ang angte xerox a, The President, Consumer Disputes Redressal Forum (mahni district) address a thehluh mai tur a ni. Mizo tawnga ziah pawh a pawi reng reng lo. Amaherawhchu, Forum-ah hian member pathum an awm thin avangin lehkha hi copy 3 tal siam a ngai thung. Case liantham deuh leh kan khinte a zirin Ukil rawih erawh a tul hun leh a fuh zawk hun a awm tho. Thubuai kan thehluh hnuah Consumer forum lamin kan khinate hnenah hriattirna pe in, hearing neih hun tur a ruatfel ang a. Lehlam insawifiahnate zirchiangin, thubuai len dan a zirin hearing neih tam pawh ngai lovin awlsam te a chinfel mai theih a ni. Khai le, consumer i nih anga i dikna chanvo humhalh dan tur zawng zawng i hre ta. I chanvo chang tura penchhuakin, thil dik lo titute hi i khinglet ngam dawn em le? Bumin i awm reng dawn em ni? ‘Sual dovin thisen chhuak khawpin in la tang lo va’ (Hebrai 12:4) titu khan a thu a la sut reng reng lo a nia.