Aizawl October 31, 2022: ZPM chhung inkhawm neihah ZPM Leader Lalduhoma chuan, Inthlan kan hmachhawn turah Eirukna leh hlemhletna kan duh lo tih kan lantir a ngai, a ti. Presbyterian Kohhran Presbytery te chuan,‘Corruption dona kawngah nasa zawkin hma la rawh se’ tih thu chu an kal tir zel avangin Synod inkhawmpui lo awm tur hian ngaihven a hlawh dawn niin a sawi.

Leader Lalduhoma, MLA chuan thu sawiin, “Eirukna leh hlemhletna hrang hrang te kan duh lo takzet a nih chuan 2023 inthlanah mipuiten kan duh loh zia kan lantir a ngai a, Ramhlui zia thlak thei tawh lo, opposition an nih lai chauha piangthar thinte hi kan hnawl ngam a hun takzet zet tawh a ni,” a ti a, “A thlawna sem, a thlawna dawn leh kut tling lova sum lak hi Pathian thu kalh tlat a ni a, chuvangin hetiang hmanga vote zawng thinte chu ringtu kan nihna anga kan hnawl a, kan kalsan ngam a hun ta. Kohhran an auchhuak tawh a, tunah chuan kan NGO lian ber YMA pawh an auchhuak leh ta hial a, eirukna leh hlemhletna hrang hrangte hi kan duh lo takzet a nih chuan nakkum inthlanah mipuite’n kan duh loh zia kan lantir a ngai a ni. Corruption chungchangah kohhran a ngawi mai mai ngai lova, vawi engemawzat hma lo la tawhin kuminah pawh Presbyterian Kohhran bial inkhawmpuiah sem policy leh corruption duhlohna nasa taka sawiho a ni tawh a. Presbytery-ah lut chhovin an rel zel a, ‘Corruption dona kawngah nasa zawkin hma la rawh se’ tih thu kalzel avangin Synod inkhawmpui lo awm tur hian ngaihven a hlawh hle dawn a ni,” a ti.

Duhoma chuan, “Sawrkarna siam turin kan inbuatsaih mek a, Mizoramin kan la hriat loh leh hmuh ngai loh thil tha kan hmu mawlh mawlh tawh dawn. Party-in a rel tawh angin CBI kan ko lut dawn a, kan sawrkar atanga ni za chhungin kan ti thei ang tih ka sawi duh a ni. India ram state hrang hranga ko lut ngam lo state 8 zingah, keini Kristian ram inti kan tel hi a zahthlak takzet a ni. Kan sawrkar hunah chuan sawrkar tha siam turin a taka thawk tur Lok Ayukta hi kan dinthar ang. Val Upa Council kan nei a, kan sawrkar a nih chuan Val Upa Council te hian an ham strick dawn a, goal vengtu turte an ni. Monitoring committee, Chief Minister kaihhruaina hnuaiah a awm ang a. Party sawrkar ni lo mipui sawrkar a nih angin party dang hruaitu te, Kohhran leh NGO hrang hrang aiawh an tel ang,” a ti bawk.

ZPM Leader chuan, "Kan sawrkarah chuan Chief Minister-in Works Portfolio a nei dawn lova, hei hi kalphung thar tha tak tur a ni. Tunah chuan kan CM ten department hmui hmui an chang tlat zel a, lui chu a hnar atangin a nu leh dawn tih a lang nghal vek a ni. Party thenkhat chu Chief Miniter an nih bakah party president hna chelhkawpin lal takin an insiam a, hei hian that lohna tamtak neiin kan sawrkarah chuan Chief Minister nih leh Party president nih kawp a rem ve dawn lo a ni. Kan ram dinhmun thlir ila, tam tak chu term khat MLA, minister an ni dek dek a, huan zau pui leh inhmun to tak, in ropui tak an nei nghal thei zel mai hi a mak. Hlawh atang ringawtin hengte neih mai theih a ni lo. Ram mipuite hian kan MLA te theuh hi bihchiang ila, kan sawi ang mi an nih chuan kan chan ai an eiru-ah ngai rawh u. Ramhluizia thlak thei tawh lo, opposition an nih lai chauha piangthar thinte hi kan hnawl ngam a hun takzet zet tawh a ni,” a ti bawk.

Vawiin ZPM chhung inkhawm hi Er. Vanlalneiha, General Secretary chuan kaihruaiin Pu Lalsanglura Ralte, Adviser chuan hunserh a hmang a, tunhnai Vangpui fehchhuah programme-a group hrang hrang fehchhuakten zin report an pe bawk. ZPM chhungkhawmah hian Lalliansawta, Party President chuan ZPM-ah mithar a lawmlut a, “Sawrkarna siam tura kan inbuatsaih meknaah mithar duhawm tak takin min rawn belh zel hi a lawmawm a, Party headquarters-in vangpui fehchhuah programme kan neih mek hian nasa leh zualin kan boruak a tikang a ni,” a ti.