Aizawl; Phaizau khua ten an humhalh Saitlan li/Ngawi dawh li a phalna nei lo a bomb hmanga sangha man a puh, H. Lalzirliana MLA leh a thawhpui mi 11 te chu Mamit District Court chuan an chungthu a rel fel tawh a.  An zinga 4 te chu 20.5.2022 khan thiam loh a chantir a, midang 8 te chu Mamit bialtu MLA telin thiam a chan tir thung a. Thiam loh chantirte hremna hi 3.6.2022 ah ngaihtuah a ni ang.

Laldinpuia Tlau, Chief Judicial Magistrate, Mamit District Court thuremna a tarlan a nih danin thiamloh chantirte chu Hreuthangpuia, Chuauthantluanga, Lalrikhuma leh Lalchawimawia an ni bawk. 

Court in thutlukna a siamnaa a tarlan danin ni 29.11.2020 khan Phaizau VC leh NGO te thuchhuah intawm chu social media ah a darh a, chutah chuan H. Lalzirliana MLA leh a thawhpui mi 11 te chu, ni 21.11.2020 ah Tut lui a Saitlan li/Ngawi dawh li, khawtlang humhalh laiah phalna nei loa bomb hmanga sangha an man avangin Rs. 10,000 chawi tura phut an ni. Hemi chungchang hi chanchinbu hrang hrangah a lan bakah Environment humhalhtu pawl pahnih ASEP leh BICONE te pawhin demna thu an chhuah bawk.

Hemi chungchang hi forest department chuan a chhui chiang nghal a, he thil thlenna hmun hi reserved forest huam chhung a nih avangin MLA leh a thuihhruaite hian section 23 (1) leh 24 (6) Mizoram (forest) Act, 1955 an bawhchhe ngei niin an hria a. DFO Mamit chuan complaint thehlutin, court in complaint a dawn ni chu 14.12.2020 a ni.

Thubuai ngaihtuah laiin sawrkar thuhretu mi 4 thu zawhfiah an ni a, thubuai neite chuan thuhretu an nei lo thung. Thubuai neite chu Sec.313 Cr. PC hmangin insawifiahna hun siam sak an ni a, an vaiin puhna zawng zawng an phat vek laiin, insawifiahna emaw an tih lohzia finfiahna emaw engmah an sawi lo.

Court in ngun taka evidence awmte a zir chian hnuin ni 21.11.2020 ah H. Lalzirliana MLA leh a thawhpui mi 11 te chu Tut luiah an kal ngei a, an zinga mi thenkhat chuan Saitlan li/Ngawi dawh li ah kalin gelatine hmangin sangha an bomb ngei tih an pawm a, sangha bomb na hmun hi rerserved forest chhung ngei a ni tih finfiah a ni bawk.

VC leh All NGO phut angin accused thenkhat chuan chawi tura phut Rs. 10,000 an pe ngei a, khawtlangin chawi tura an phut pek chungchang hi accused no 1-4, an vaiin Mamit a mite chuan an hriatpui loh thu an sawi vek a, accused no 5-12, an vawiin Phaizau khuaa mite chuan an pek ngei thu an pawm thung. VC leh khawtlang hruaitute hnena Rs. 10,000 petutte chu Hreuthangpuia, Chuauthantluanga, Lalrikhuma, Lalchawimawia leh Chanchinmawii te an ni.

Khawtlangin Saitlan li/Ngawi dawh lia sangha bomb nia an puh avanga pawisa chawi tura an tih, thuawih taka pawisa lo chawitute chu puh an nihna court in pawm tlakah a ngai a, thiam loh a chan tir (convict) a. Pawisa chawi tura an phut an pek chhan chu phalna loa bomb hmanga sangha an man nia puhna an pawmzia lantirna ah court chuan a ngai a, pawisa chawitute zinga tel Chanchinmawii chu DFO, Mamit forest division hmaa a thusawi leh thubuai nei dangte thusawi ah Saitlan li/Ngawi dawh lia a kal thu leh sangha a bomb ve thu a lang lo a, chumi vang chuan thiam loh chan tir zing ah a tel ve lo thung. 

Court chuan chanchinbua thuchhuah te, pawl thenkhat press release te leh social media hmanga thuchhuahte chu thubuai neite thiam loh chan tirna tur chhan tlingah a ruat lo a, chuvang chuan finfiahna tha tawk awm lo nia ngaiin benefit of doubt a pe a, thiam loh chan tir mi 4 te bak midang 8 te chu thiam a chan tir a, hremna tur chu 3.6.2022 ah court in a ngaihtuah ang.