June 6, 2022; Chief Judicial Magistrate, Mamit chuan May 20, 2022 a thiam loh a chantir tawh mi 4, Hreuthangpuia, Chuauthantluanga, Lalrikhuma leh Lalchawimawia te hremna chungchang chu June ni 3, 2022 khan a ngaihtuah a, court chuan dan an bawhchhiat avangin Rs. 550/- ṭheuh chawitirin a chhuah.

Kum 2020, November ni 21 a Phaizau khawtlang lui humhalh laia bomb hmanga Sangha mana puh, Mamit Chief Judicial Magistrate in thiam loh a chantir mi 4 te chu jail tang loin, pawisa a chawitir a, pawisa an chawi zawng zawng hi a hma a VC leh NGO te hnen a an lo pek tawh nen, Rs. 12,200/- a tling.

Thil tisualtute chu khawtlang humhalh thil venghim tur an nih laiin, a tisualtu (sangha man phallohna hmuna man) an nih avangin, an tihsual man phutawk hremna pek theih an nih thu court order ah chuan tarlan niin, hetihlai hian thil tisualtute chu khawtlang tana mi hnawksak an nilo a, tum reng vanga thil tisual niloin MLA leh a thuihhruaite lo lawm nan a ti an nih thu te, Phaizaua cheng, khawsak harsa tak tak an nih bakah, an tihsual manah Rs. 10,000 an chawi tawh thu te tarlan a ni.

Section 23(2) of the Mizoram Forest Act 1955 ah chuan, an dan bawhchhiat chu cheng 50 thleng chawi theih emaw, an thil tihchhiat a zirin, cheng 25 man aia sang a nih chuan chawi thei zat a pun belh ang tih a nih thu te, Section 24(6) of the Mizoram Forest Act ah chuan thla 6 thleng tan emaw Rs. 500 chawitir emaw a pahnih a hrem kawp theih a nih thu te court order ah chuan tarlan a ni bawk.

An thil tihsual leh a tisualtute dinhmun enin, VC leh NGO te hnena a tisualtu ten an lo chawi tawh te nen, thil tisualtu mi 4 te chu Rs. 50 Section 23(2) MFA bawhchhiat avang leh Rs. 500 Section 24(6) MFA tho bawhchhiat avangin chawi tur a tih an nih thu tarlan a ni bawk.

Tarlan tawh angin, kum 2020 November ni 21-a Phaizau khawtlang lui humhalh laia bomb hmanga Sangha mana puh Mamit bialtu MLA, H. Lalzirliana chu Mamit Chief Judicial Magistrate-in May ni 20, 2022 khan a thiamlohna finfiahna chiah a awm loh avangin 'benefit of doubt' a pe a, a thuihhruai mi 4 te erawh thiam loh a chantir thung.