Aizawl December 24, 2022: Mizoram sawrkar hnuaia State Nodal Officer & Spokesperson on Covid-19, Dr Pachuau Lalmalsawma chuan mipuite  ngenna a chhuah a, hunpui kan hman chhoh mekah a theih anga Covid Appropriate Behaviour (CAB) zawm tha turin mipuite a ngen.

Dr. Pachuau Lalmalsawmna chuan, "Tun hnaia Japan, USA, Republic of Korea, Brazil leh China a Covid hrik chhuak thar BF.7 a pun chhoh mek avangin Union Health Minister Dr Mansukh Mandaviya hova December ni 23 (Zirtawpni) tlai lama ram pum huap Video Conference neiah state hrang hrang hmalakna turte sawichhuah," a ni a ti.

State Nodal Officer & Spokesprson on Covid-19 chuan, "Mipui lam pawhin heng – mask vuah that, mi dang hnaih tam loh leh kut tihfai thinte hi thar thawh leh tura tha tih a nih angin kan hunpui chhovah hian zoram mipuite CAB a theih ang anga zawm turin kan in ngen a ni," a ti. 

BF 7 Covid lanchhuah dan

Covid variant thar BF 7 hi mihring nunna atan a hlauhawm tih hmuchhuah a ni tawh. BF 7 hi a darh chak hle a, a bik takin Baijing-ah a hluar chho hle. BF 7 Covid Variant hi July khan India-ah hmuh tan a ni a. Mi pakhatin mi 10-17 thleng a kai theih anga chhut a ni. 

BF 7 Covid Variant hi a hmaa Omicron ai khan a thawk na zawk a, a natna lanchhuah dan ber chu khawsik a ni a, mahse, mihringah a thawh dan a inang vek lo. Thenkhat chu hnap tawlh reng ten an awm a, hrawk na an awm bawk a, thenkhat chu an taksa te a na thum thin a ni.